ئاڤای خەڵک؛ لە چەمچەماڵ 12 ڕۆژێک جارێک ئاو بە هاووڵاتیان دەدرێت

ئاڤا نیوز

بەهۆی لافاوکەی ئەم دواییە، کێشەی کەمئاویی لە چەمچەماڵ، تەکیە و شۆڕش زیاتر بووە و دانیشتوانەکەی دەڵێن: ئاوی خواردنەوە لێڵ بووە و 12 ڕۆژ جارێک ئاویان پێدەدرێت.

 

کێشەی سەرەکی؛ دوای لافاوەکەی چەمچەماڵ، تەکیە و شۆڕش، ئاوی ئەو ناوچانە کەمی کردووە و دانیشتووانەکەی بە ئاڤایان ڕاگەیاند،  ئەو ئاوەی لەڕێگەی هێڵی 2ی دووکان بۆ چەمچەماڵ دەڕوات لێڵ بووە، لافاو وێستگەی کانی شەیتانی تێکداوە، کە وێستگەیەکی ئاوی خواردنەوەیە، چەمچەماڵ خۆی هەر کێشەی ئاوی هەبووە، کەمئاویشی هاتووەتەسەر، دەشڵێن: "پێدانی ئاو بووەتە 12 ڕۆژ جارێک".

 

چارەسەر؛ چیا هیدایەت، بەرپرسی ڕاگەیاندنی بەڕێوەبەرایەتیی ئاوی چەمچەماڵ بە ئاڤای راگەیاند، لە 24 کاتژمێری داهاتوو، چەمچەماڵ پێویستی بە 40 هەزار مەتر سێجا ئاوی خواردنەوە هەیە، ئێستا کەمتر لە 20 هەزار مەتر سێجا ئاو دەگاتە قەزاکە،

 

- "تیمەکانمان کار بۆ ئەوە دەکەن کێشەکانی ئاو چارەسەر بکەن، چونکە وێستگەی کانیی شەیتان 8 ترۆمپای ئاوی هەیە، بەهۆی لافاوەکەوەی ئەم دواییە لە کار کەوتوون، ئێستا دوو ترۆمپا چاککراوەتەوە، لە ڕۆژی داهاتووش ئەوانی دیکەش چاک دەکرێنەوە و پێدانی ئاو وەکو ئاسایی دەبێتەوە".

 

زانیاریی زیاتر: لەدوای لافاوەکەوەی ئەم دواییە، بە 3 ڕێگا خەڵک ئاویان دەست دەکەوێت، بەشێکیان لە بیرەکانی ئاو، هەندێکی دیکەش خێرخوازان ئاویان بۆ دابین دەکەن ئەوانی دیکەش بەناچاریی ئاو بە تانکەر دەکڕن.