هۆشیار زێباری: پشتیوانی بافڵ تاڵەبانی بۆ پۆستی سەرۆککۆمار دەکەین، بەڵام ..

ئاڤا نیوز

ئەندامێکی دەستەی کارگێڕی مەکتەبی سیاسی پارتی دەڵێت، پۆستی سەرۆککۆماری عێراق مافی کوردە و کاندیدی ئەو پۆستە پێویستە کۆدەنگی لەسەر بێت نەک لایەنێک خۆی کێی بوێت کاندیدی بکات، ئاشکراشی دەکات کە هەرچەندە پشتیوانی کاندیدکردنی بافڵ تاڵەبانی بۆ ئەو پۆستە دەکەن، بەڵام بەهۆی کێشەی "زمان، بڕوانامە و لەدایکبوونەوە" قورسە لایەنەکانی عێراق پێشوازی لە کاندیدکردنی بکەن.

وێنە گەورەکە: تا ئێستا پارتی و یەکێتی لەسەر پرسی پێکهێنانی حکومەتی عێراق نەگەیشتوون بە ڕێککەوتن و هیچ کامێکیشیان بە فەرمی کاندیدیان بۆ پۆستی سەرۆککۆمار دیاریینەکردووە، بەڵام لە میدیاکانی عێراق هەواڵی ئەوە بڵاوبووەتەوە کە بافڵ تاڵەبانی، سەرۆکی یەکێتیی نیشتیمانیی کوردستان خواستی خۆکاندیدکردنی بۆ ئەو پۆستە بە چەند لایەنێکی عێراقی گەیاندووە.

لێدوانی فەرمی: هۆشیار زێباری، ئەندامی دەستەی کارگێڕی مەکتەبی سیاسی پارتی دیموکراتی کوردستان ئەمڕۆ شەممە بە کەناڵی شەرقییە نیوزی راگەیاند، هۆکاری پێکنەهێنانی حکومەتی هەرێمی کوردستان "ململانێی ئیرادەیە، چونکە هەرچەندە ڕوانگەی هاوبەشمان داڕشتبوو و پێش هەڵبژاردن بەرکەوتەی باشمان بە یەکێتیدا، بەڵام ئەوان کاتیان کوشت، ئێستاش دۆخەکە گۆڕاوە و ئێمە بەجیا گفتوگۆ لەسەر پێکهێنانی کابینەی حکومەتی کوردستان و عێراق دەکەین".

زانیاریی زیاتر: لەبارەی ئەگەری خۆکاندیدکردنی بافڵ تاڵەبانیش بۆ پۆستی سەرۆککۆماری عێراق، زێباری وتی، ئەم پۆستە مافی کوردە و دەبێت کاندیدی کورد بۆ ئەم پۆستە کۆدەنگی لەسەر بێت نەک لایەنێک کێی بوێت ئەو کاندید بکات، لەگەڵ ئەوەشدا پشتیوانی کاندیدکردنی بافڵ تاڵەبانی بۆ ئەو پۆستە دەکەن، بەڵام باوەڕیان وایە بەهۆی کێشەی "زمان، بڕوانامە و لەدایکبوونەوە" قورسە لایەنەکانی عێراق پێشوازی لە کاندیدبوونی بافڵ تاڵەبانی بکەن و بیرۆکەکەیان بەدڵ نابێت، بۆیەش پێشبینی ناکەن ناوبراو خۆی کاندید بکات.