پڕۆژەی "خۆرهەڵاتن" غەززە لە وێرانبوونەوە دەگۆڕێت بۆ پێشکەوتووترین ناوچەی جیهان

ئاڤا نیوز

ڕۆژنامەی وۆڵ ستریت جۆرناڵی ئەمریکی ئاشکرایکردووە، ئیدارەی سەرۆک دۆناڵد ترەمپ، پڕۆژەیەکی گشتگیر و گەورەی بەناوی پڕۆژەی "خۆرهەڵاتن" ئامادە کردووە، پێشنیازی گۆڕینی کەرتی غەززە لە ناوچەیەکی وێرانە بۆ شارێکی مۆدێرن، گەشتیاری و خاوەن تەکنەلۆژیای پێشکەوتوو دەکات.

چیرۆکی سەرەکی: پرۆژەی "خۆڕهەڵاتن" لەلایەن تیمێکی تایبەتی کۆشکی سپی، بە سەرۆکایەتی جارید کوشنەر و ستیڤ ویتکۆف، نێردەی تایبەتی ئەمریکا بۆ کاروباری ڕۆژهەڵاتی ناوەڕاست ئامادە کراوە،  پرۆژەکە لە 32 لاپەڕە پێکهاتووە، وێنەی خەیاڵی بۆ غەززەی داهاتوو دەخاتەڕوو، هۆتێلی پێشکەوتوو، هێڵی شەمەندەفەری خێرا و تۆڕی کارەبای زیرەکی پشتبەستوو بە ژیریی دەستکرد دەردەکەون.

لێدوانی فەرمی: مارکۆ ڕوبیۆ، وەزیری دەرەوەی ئەمریکا، لە کۆنگرەییەکی رۆژنامەوانیدا ڕایگەیاند، هیچ کەسێک پارە لە غەززەدا خەرج ناکات، ئەگەر پێشبینی ئەوە بکات دوو یان سێ ساڵی دیکە شەڕ ڕوودەداتەوە، وتیشی: کۆمەڵگەی نێودەوڵەتی کاری زۆری لە پێشە بۆئەوەی پاراستنی ڕێککەوتنامەی ئاشتی لە غەززە بەردەوامی پێبدات.

زانیاریی زیاتر: بەگوێرەی ڕەشنووسی پرۆژەی "خۆرهەڵاتن" تێچووی گشتی ئاوەدانکردنەوەی غەززە بە 112ملیار دۆلار دەخەمڵێنرێت و لە ماوەی 10 ساڵدا جێبەجێ دەکرێت، ئیدارەی ترەمپ جەخت لەوە دەکاتەوە، بەبێ داماڵینی چەک لە حەماس و تێکدانی هەموو تونێلەکانی ناو غەززە، ئەو خەونە نایەتەدی.