زەکەریا عەبدوڵڵا لەڕێگەی ئاڤا خانوویەک بۆ خێزانێکی لێقەوماوی چەمچەماڵ دەکڕێت

ئاڤا نیوز

 

زەکەریا عەبدوڵڵا، هونەرمەندی گەورەی کورد لە ڕێگەی ئاڤا خانوویەک بۆ خانەوادەیەکی لێقەوماوی لافاوەکەی ناحیەی شۆڕشی سەر بە قەزای چەمچەماڵ دابین دەکات.

 

چیرۆکی سەرەکی: پیاوی ماڵەکە ناوی وەلیدە و پیشەی تەنەکەچیە و خاوەنی پێنج منداڵە، وەلید نەخۆشیی درێژخایەنی شەکرەی هەیە، کاتی لافاوەکە خۆی و منداڵێکی کە ئەویش نەخۆشە لافاو دەیانبات و بە زەحمەت ڕزگار دەکرێن. ئێستا لە خانووە وێرانبووەکەیان دەژین و هیچیان بۆ دەرنەچووە، ئەوان لەڕێگەی ئاڤاوە داوای بەهاناوەچوویان لە خێرخوازان دەکرد.

 

ئەو خێزانە کە لە ناحیەی شۆڕشی سەربە قەزای چەمچەماڵ دەژین، دوای نۆ ڕۆژ لە لافاوەکەی چەمچەماڵ و دەوروبەری، هێشتا نەیانتوانیوە ماڵەکەیان پاک بکەنەوە، ئەوان کوردی شەبەکن و لەکاتی شەڕی داعش هاتووەنەتە ئەو ناوچەیە، لەکاتی لافاوەکە بێ ماڵ و حاڵ بوون و زیانێکی زۆریان بەرکەوت.

 

ئەوەی پێویستە بیزانیت: لە پەخشی ڕاستەوخۆ هەوراز گوڵپی، پێشکەشکاری ژمارەیەکی کوردستان مژدەی ئەوە بەو خانەوادەیە دەدات کە هونەرمەندی گەورەی کورد، زەکەریا عەبدوڵڵا هاوکاریان دەکات و خانوویەکیان بۆ دەکڕێت.