هەواڵگریی عێراق: هیچ هۆشدارییەکمان لەبارەی هەڕەشەی کردەی سەربازیی ئیسرائیل پێنەگەیشتووە

ئاڤا نیوز

 

دەزگای هەواڵگریی عێراق ڕەتی دەکاتەوە وڵاتێکی عەرەبی و هەواڵگریی وڵاتێکی ڕۆژئاوا لە مەترسیی هێرشێکی ئیسرائیل بۆسەر گرووپە چەکدارەکانی وڵاتەکەی ئاگادارییان کردبێتەوە، دەشڵێت، حکومەتی عێراق هیچ نامە و هۆشدارییەکی لەو شێوەیەی پێنەگەیشتووە.

 

ئەوەی پێویستە بیزانیت: ڕۆژنامەی شەرقولئەوسەتی سعودی لە ژمارەی دوێنێیدا و لە زاری سەرچاوەیەکەوە بڵاوی کردەوە، وڵاتێکی عەرەبی و دەزگای هەواڵگریی وڵاتێکی ڕۆژئاوا، بەرپرسانی حکومەتی عێراقیان ئاگادارکردووەتەوە کە بەرپرسانی ئیسرائیل باس لەوە دەکەن گڵۆپی سەوزی ئەمریکایان بۆ لێدان لە گرووپە چەکدارەکانی عێراق بەدەستهێناوە و مەترسیی ڕاستەقینە هەیە سەرکردەکانیان، ژێرخانی سەربازیی و داراییان بکرێتە ئامانج.

 

ڕاگەیێنراوی فەرمی: دەزگای هەواڵگریی عێراق کۆی زانیارییەکانی ڕۆژنامە سعودییەکە ڕەت دەکاتەوە و ئەمڕۆ یەکشەممە لە ڕاگەیێنراوێکدا ئاماژەی بەوەداوە، حکومەتی عێراق هیچ نامەیەکی لەو شێوەیەی بەدەستنەگەیشتووە کە باس لە مەترسی کردە سەربازیی لە عێراق بکات، بۆیەش داوای لە دەزگاکانی ڕاگەیاندن کردووە بۆ ئەو بابەتانەی پەیوەندییان بە ئاسایشی نەتەوەیی عێراقەوە هەیە، بە وریایی و وردییەوە مامەڵە بکەن.

 

ئەم پێشهاتە هاوکاتە لەگەڵ دەستپێشخەریی بەشێک لە گرووپە چەکدارەکانی عێراق کە خۆیان داوای هێشتنەوەی چەک لە دەستی دەوڵەت دەکەن، بەهۆکاری ئەوەی چیتر هەڵگرتنی چەک لە دەرەوەی دامەزراوەکانی دەوڵەت پێویست نەماوە.