بکوژی پێشمەرگەکەی پیرەمەگروون خۆی ڕادەستی هێزە ئەمنییەکان کرد

ئاڤا نیوز

 

ئەو پێشمەرگەیەی شەوی ڕابردوو لەسەر دەمەقاڵێ پێشمەرگەیەکی هاوڕێی کووشت، خۆی ڕادەستی هێزەکانی یەکەی 70 کردووە و دەستگیر کرا.

 

چیرۆکی سەرەکی: شەوی ڕابردوو، لە پرۆژەیەکی ئاو لە گوندی زێوێ لە ناحیەی پیرەمەگروونی سەر بە قەزای دووکان لەکاتی ئەرکدا دەمەقاڵێ لەنێوان دوو پێشمەرگەی یەکەی 70 دروست بوو، بەگوێرەی گێڕانەوەکان سەرەتا کۆتایی بە دەمەقاڵێکەیان هاتووە و دواتر دیسان دەمەقاڵێیان دروست بووەتەوە، چەکیان بەکارهێناوە و تەقەیان کردووە، بەهۆیەوە یەکێک لە پێشمەرگەکان بە ناوی (ع.ح.خ)ـە و تەمەنی 44  ساڵ گیانی لەدەست دا.

 

لێدوانی فەرمی: ئەحمەد لەتیف، وتەبێژی هێزەکانی یەکەی 70 بە ئاڤای گوت، "بکووژی (ع.ح.خ) چەند کاتژمێرێک دوای ڕووداوەکە خۆی ڕادەستی هێزەکانی یەکەی 70 کردووە و ئێستا لای ئێمە دەستبەسەرە و لێکۆڵینەوە لەگەڵیدا بەردەوامە."

 

زانیاریی زیاتر: ئەو پێشمەرگەیەی کە کوژراوە و ئەوەشی کە بکوژە، هەردووکیان پلەیان نائیب زابت بووە و خەڵکی سنووری قەڵادزێن.