فایەق زێدان سوپاسی گرووپە چەکدارەکانی عێراق دەکات

ئاڤا نیوز

 

سەرۆکی ئەنجوومەنی باڵای دادوەریی عێراق سوپاسی گرووپە چەکدارەکان دەکات کە "گوێیان لە ئامۆژگارییەکەی گرتووە" بە ئامانجی هێشتنەوەی چەک لەدەستی دەوڵەت و گواستنەوەیان بۆ کاری سیاسیی، دوای ئەوەی وڵات پێویستی بە کاری سەربازیی نەما.

 

ئەوەی پێویستە بیزانیت: ماوەیەکە ژمارەیەک لە سەرکردەی گرووپە چەکدارەکانی عێراق بە ئاشکرا و خۆیان داوای هێشتنەوەی چەک لە دەستی دەوڵەتدا دەکەن، ئەوەش بە پێشهاتێکی تازە دادەنرێت لە چوارچێوەی هەوڵەکانی حکومەتی عێراق بۆ کۆنتڕۆڵکردنی چەکی دەستی گرووپە چەکدارەکان و خۆگۆڕینی گرووپەکان بۆ پارتی سیاسی و خەباتی پەرلەمانی.

 

لێدوانی فەرمی: فایەق زێدان، سەرۆکی ئەنجوومەنی باڵای دادوەریی عێراق دوێنێ شەممە لە پەیامێکدا سوپاسی گرووپە چەکدارەکان دەکات کە وەڵامی "ئامۆژگارییەکەمیان دایەوە بۆ هەماهەنگی و پێکەوەیی بۆ سەپاندنی یاسا و هێشتنەوەی چەک لە دەستی دەوڵەتدا".

 

ئەوەشی خستووەتەڕوو، ئەم گرووپانە تێکەڵ بە کاری سیاسی دەبن دوای ئەوەی چیتر وڵات پێویستی بە کاری سەربازیی نەماوە.