هاوپەیمانیی نەسر: دۆسیەی سەرۆکوەزیرانی عێراق هەفتەی داهاتوو یەکلایی دەکرێتەوە

ئاڤا نیوز

 

هاوپەیمانیی نەسر ڕایگەیاند، کۆبوونەوەی چڕوپڕ لەناو چوارچێوەی هەماهەنگی هەیە، بە ئامانجی گەیشتن بە لێکتێگەیشتنی کۆتایی سەبارەت بە دابەشکردنی پۆستەکان و پێشبینیش دەکات دۆسیەی هەڵبژاردنی سەرۆکوەزیران لە هەفتەی داهاتوودا یەکلایی بکرێتەوە.

 

وێنە گەورەکە: لەگەڵ دیاریکردنی 29ـی 12 بۆ یەکەم دانیشتنی خولی نوێی پەرلەمانی عێراق، هێشتا هێزە سیاسییەکان نەیانتوانیوە لەسەر کاندیدێکی هاوبەش بۆ پۆستی سەرۆکی پەرلەمان، سەرۆکوەزیران و سەرۆککۆمار ڕێکبکەون.

 

لێدوانی فەرمی: ئەمڕۆ یەکشەممە، ئەندامی هاوپەیمانیی نەسر، عەقیل ڕدینی، لە لێدوانێکدا  بۆ میدیاکانی عێراق ڕایگەیاند "چوارچێوەی هەماهەنگی کاتی هەیە بەپێی دەستوور بۆ ماوەی 60 ڕۆژ بۆ ناونانی گەورەترین کوتلە و ڕاسپاردنی سەرۆکوەزیران و پێکهێنانی حکومەت".

 عەقیل ڕدینی ئەمانەشی وت: 

_ چوارچێوەی هەماهەنگی پەرۆشە بۆ پێکهێنانی حکومەتێکی بەهێز کە بتوانێت ڕووبەڕووی ئاڵنگارییە ئابووری و ئەمنییەکانی وڵات ببێتەوە.

_ سەرۆکایەتیی کۆمار هەمیشە پۆستێکی گرنگ بووە بۆ لایەنە کوردییەکان و ئەمجارەش کێبڕکێی لەسەر گەرمە.

_ چاوەڕوان دەکرێت هەفتەی داهاتوو هەفتەیەکی پڕ لە ڕووداو بێت بۆ پرۆسەی سیاسی عێراق.