ئەمریکا وەڵامی پەیامەکەی فایەق زێدان لەبارەی گرووپە چەکدارەکان دەداتەوە

ئاڤا نیوز

 

ئەندامێکی کۆنگرێسی ئەمریکا  وەڵامی فایەق زێدان دەداتەوە و دەڵێت، ''دەسەڵاتی دادوەریی سەربەخۆ سوپاسی گرووپە چەکدارەکان ناکات بۆ جێبەجێکردنی ئامۆژگارییەکانیان، ئەم جۆرە ڕەفتارانە لە دەرەوەی ڕۆڵی دەستووریی خۆیانن.''

 

وێنە گەورەکە: ڕۆژی شەممە لە پەیامێکدا فایەق زێدان، سەرۆکی ئەنجوومەنی باڵای دادوەریی عێراق سوپاسی گرووپە چەکدارەکانی کرد کە "گوێیان لە ئامۆژگارییەکەی گرتووە" بە ئامانجی هێشتنەوەی چەک لەدەستی دەوڵەت و گواستنەوەیان بۆ کاری سیاسیی، دوای ئەوەی وڵات پێویستی بە کاری سەربازیی نەما.

 

بڵاوکراوەی فەرمی: جۆو ویڵسن، ئەندامی کۆنگرێسی ئەمریکا لە پارتی کۆمارییەکان لە ئێکس پەیامێکی بڵاو کردەوە و نووسیوویەتی، "ئەو سوپاسگوزارییەی سەرۆکی ئەنجوومەنی باڵای دادوەریی عێراق ئاراستەی گرووپە چەکدارەکانی کرد لە بەرامبەر هەوڵی داماڵینی چەکەکانیان،  ئەو زمانە زمانی دامەزراوەیەکی دەستووری نییە کە ئەرکی پاراستنی یاسا بێت، بەڵکو ئەمە ڕەنگدانەوەی هەڵسوکەوتی و پەیوەندییەکەی نێوان سەرکردایەتیی دادوەری و میلیشیاکاندایە. ئەمە گەورەترین هەڕەشەیە بۆ سەر دادپەروەری و خودی قەوارەی دەوڵەت.''

 

-ویڵسن دەشڵێت، ''دەسەڵاتی دادوەریی سەربەخۆ سوپاسی گرووپە چەکدارەکان ناکات بۆ جێبەجێکردنی ئامۆژگارییەکانیان، ئەم جۆرە ڕەفتارانە لە دەرەوەی ڕۆڵی دەستووریی خۆیانن. جەخت لەوەش دەکاتەوە ئەم پرسە پەیوەندی بە بەرزڕاگرتنی سەروەری یاساوە نییە بەڵکو  پەیوەندی بە ناردنی پەیامیی سیاسی لە ژێر پەردەی یاساییدایە.''

 

باکگراوند: ماوەیەکە ژمارەیەک لە سەرکردەی گرووپە چەکدارەکانی عێراق بە ئاشکرا و خۆیان داوای هێشتنەوەی چەک لە دەستی دەوڵەتدا دەکەن، ئەوەش بە پێشهاتێکی تازە دادەنرێت لە چوارچێوەی هەوڵەکانی حکومەتی عێراق بۆ کۆنتڕۆڵکردنی چەکی دەستی گرووپە چەکدارەکان و خۆگۆڕینی گرووپەکان بۆ پارتی سیاسی و خەباتی پەرلەمانی.