ناوی 1600 مامۆستای "پاشکۆ" ڕەوانەی ئەنجوومەنی وەزیران دەکرێت

ئاڤا نیوز

دوای تەواوکردنی وردبینی و چاککردنی کەموکوڕییەکانیان، ئەم هەفتەیە ناوی مامۆستایانی "پاشکۆ" لە وەزارەتی خوێندنی باڵا بۆ مەبەستی دامەزراندن بە شێوەی گرێبەست، ڕەوانەی ئەنجوومەنی وەزیران دەکرێت.

چیرۆکی سەرەکی: لە کاتی پرۆسەی گۆڕینی مامۆستایانی وانەبێژ بۆ گرێبەست، بەشێک لە مامۆستایانی خوێندنی باڵا بەهۆی کەموکوڕی لە مامەڵەکانیان، ناویان لە لیستە سەرەکییەکاندا نەبوو و وەک "پاشکۆ" لە ئەنجوومەنی ڕاژە مابوونەوە. ئێستا لیژنەیەکی تایبەت وردبینیی بۆ تەواوی مامەڵەکانیان کردووە و کێشەکانیان چارەسەر کراوە.

لێدوانی فەرمی: محەممەد نەجیب، نوێنەری مامۆستایانی گرێبەستی وەزارەتی خوێندنی باڵا بە ئاڤا نیوزی ڕاگەیاند: ئەم هەفتەیە لیژنەی وەزارەت مامەڵەی ئەو مامۆستایانە تەواو دەکات و بە لیستێک ڕەوانەی ئەنجوومەنی وەزیرانیان دەکات."

"ژمارەی ئەو مامۆستایانەی لە لیستی پاشکۆدان، نزیکەی هەزار و 600 کەس دەبێت."

هەنگاوی داهاتوو: دوای گەیشتنی لیستەکە بۆ ئەنجوومەنی وەزیران، جارێکی دیکە وردبینییان بۆ دەکرێت و لە ئەگەری پەسندکردنیان، وەک مامۆستای گرێبەست لە زانکۆ و پەیمانگاکان دەستبەکار دەبن.

باکگراوند: ساڵی ڕابردوو لەسەر ڕاسپاردەی سەرۆکوەزیران مەسرور بارزانی، سەرجەم مامۆستایانی وانەبێژ لە هەرێمی کوردستان کرانە گرێبەست و مووچەکانیان لەسەر داهاتی ناوخۆ دابین دەکرێت. ئامارەکان بەم شێوەیەن:

ژمارەی مامۆستایانی گرێبەستی وەزارەتی پەروەردە: 37,933 مامۆستا.

ژمارەی مامۆستایانی ئێستای وەزارەتی خوێندنی باڵا: 4,100 مامۆستا.

کۆی تێچووی مووچەی مانگانەیان: 24 ملیار دینار.