چوار شوێنەواری دەڤەری ئاكرێ نۆژەن دەكرێنەوە

ئاڤا نیوز

چوار شوێنەواری گرنگی دەڤەری ئاكرێ لەلایەن دوو ڕێكخراوی ئەڵمانی نۆژەن دەكرێنەوە، كە بەڕێوەبەرایەتیی گشتیی شوێنەوارە كەلەپوورییەكانی هەرێمی كوردستان بەهەماهەنگی لەگەڵ بەڕێوەبەرایەتی شوێنەواری دهۆك و ئاكرێ چاودێری پرۆژەكە دەكەن.

چیرۆكی سەرەكی: هەردوو ڕێكخراوی 'لۆتس فلەوەر' و 'گیز'ـی ئەڵمانی دەستیانكردووە بە كۆكردنەوەی زانیاری و كارە سەرەتاییەكانی نۆژەنكردنەوەی چوار شوێنەواری گرنگی ئاكرێ ئەوانیش؛ شوێنەواری مێژوویی 'قشلەی ئاكرێ' لە سەنتەری قەزای ئاكرێ، 'مزگەوتی ئەسحابان' لە ناحیەی بجیل، 'قەڵای گوندک' و ڕێگەی بەرەو 'ئەشكەوتی گوندك'ـن، هەردوو بەڕێوەبەرایەتیی شوێنەواری دهۆك و ئاكرێ سەرپەرشتی پرۆژەكان دەكەن.

بۆچی گرنگە: نۆژەنكردنەوەی شوێنەوارە مێژووییەكانی دەڤەری ئاكرێ دەبێتە هۆی زیاتر بووژاندنەوەی كەرتی گەشتیاریی دەڤەرەكە، جگە لەوەش جێبەجێكردنی پرۆژەكان، دەرفەتی كاری بۆ 75 هاونیشتمانی لە دەرچووانی بەشی شوێنەوارناسی و ئەندازیارانی مەدەنی و كرێكاری ناوخۆیی دەڕەخسێنێت.

لێدوانی فەرمی: د. بێكەس بریفكانی، بەڕێوەبەری گشتیی شوێنەوار و كەلەپووری دهۆك بە ئاڤای ڕاگەیاند، جێبەجێكردنی ئەو پرۆژانە دەرفەتی كار بۆ زیاتی لە 75 هاونیشتمانی ڕەخساندووە لە دەرچووانی زانكۆ، بەشی شوێنەوارناسی، ئەندازیاران و كرێكارانی بیناسازی.

ئاماژەی بەوەشكرد، چەندین ڕێكخراوی دیكەی شوێنەوارناسی و ژینگەیی دەستپێشخەرییان كردووە بۆ بەشداریكردن لەو پرۆژە گرنگە.