پەرلەمانی عێراق ئامادەکارییەکانی بۆ یەکەم دانیشتن تەواو کرد

ئاڤا نیوز

پەرلەمانی عێراق هەموو ئامادەکارییە تەکنیکی و لۆجستییەکانی بۆ یەکەم دانیشتنی خولی شەشەمی خۆی تەواو کردووە، کە بڕیارە ڕۆژی دووشەممەی داهاتوو بەڕێوەبچێت. ئەمە لە کاتێکدایە چاودێران چاوەڕوانی یەکلاییکردنەوەی پۆستە دەستوورییە سەرەکییەکانن، بەتایبەت سەرۆکایەتیی پەرلەمان، کە کاریگەری لەسەر پێکهێنانی حکومەتی نوێ و پڕۆگرامەکەی دەبێت.

وێنە گەورەکە: سەرەڕای دیاریکردنی ڕۆژی 29ـی ئەم مانگە وەک یەکەم دانیشتنی خولی نوێی پەرلەمانی عێراق، تاوەکو ئێستا شیعە، سوننە و کورد نەگەیشتوونەتە ڕێککەوتن لەسەر دیاریکردنی کاندید بۆ پۆستی سەرۆکوەزیران، سەرۆکی پەرلەمان و سەرۆککۆمار.

بڵاوکراوەی فەرمی: بەگوێرەی ئەو سەرچاوانەی قسەیان بۆ ڕۆژنامەی "سەباح" کردووە، فەرمانگە پەیوەندیدارەکان، بەتایبەت فەرمانگەی ڕاگەیاندن و پەیوەندییە گشتییەکان، ئامادەکارییەکانیان تەواو کردووە بۆ دڵنیابوونەوە لە بەڕێوەچوونی دانیشتنەکە بەپێی چوارچێوە یاسایی و ڕێکارییەکان.

ئەوەی پێویستە بیزانیت: بەرنامەی کاری دانیشتنەکە هەڵبژاردنی سەرۆک و جێگرەکانی لەخۆدەگرێت، کە شایستەیەکی دەستوورییە و ڕێگاخۆشکەرە بۆ تەواوکردنی بەشەکانی دیکەی پڕۆسەی سیاسی.

بەتەنیشت ئەو بابەتەوە: شەوی ڕابردوو ئەنجوومەنی سیاسی نیشتمانی (سوننەکان) لە ماڵی سابت عەباسی، سەرۆکی هاوپەیمانیی "حەسمی نیشتمانی"، کۆبوونەوە. لە کۆبوونەوەکە تیشک خرایە سەر گفتوگۆکردن دەربارەی گەشەسەندنەکانی دۆخی سیاسی و ڕێگاکانی یەکلاییکردنەوەی شایستە دەستوورییەکان لە وادە دیاریکراوەکاندا.

لەهەمانکاتدا: بڕیارە ئێوارەی ئەمڕۆ دووشەممە چوارچێوەی هەماهەنگی (شیعەکان) کۆبوونەوەی خولی خۆیان ببەستن، بەڵام بەگوێرەی زانیارییەکانی ئاڤا لە کۆبوونەوەی ئەمڕۆ پرسی کاندیدێک بۆ سەرۆکوەزیران یەکلا ناکرێتەوە.