داواکارییەکانی بەغدا جێبەجێ کران و دەست بە ڕێکارەکانی ناردنی مووچە دەکرێت

ئاڤا نیوز

حکومەتی هەرێمی کوردستان هەموو ئەو مەرج و پابەندییانەی جێبەجێ کرد کە وەزارەتی دارایی عێراق بۆ ناردنی مووچە داوای کردبوون؛ چاوەڕوان دەکرێت لە چەند ڕۆژی داهاتوودا ڕێکارە بانکییەکان تەواو بکرێن.

چیرۆکی سەرەکی: ئەمڕۆ دووشەممە 22-12-2025، وەزارەتی دارایی و ئابووریی هەرێمی کوردستان بڕی 120 ملیار دیناری داهاتی ناوخۆی ڕادەستی بەغدا کرد. هاوکات، وەزارەتی نەوت نووسراوی فەرمیی ئاراستەی وەزارەتی دارایی کردووە و تێیدا جەختی کردووەتەوە کە هەناردەکردنی نەوتی کوردستان بەردەوامە و هیچ گرفتێکی تەکنیکی یان یاسایی نییە.

زانیاریی ئاڤا: هەریەکە لە "تەرازووی پێداچوونەوە" (میزان مراجەعە)، نووسراوی وەزارەتی نەوت و بڕیاری ناردنی 120 ملیار دینارەکە، گەیشتوونەتە دەستی تەیف سامی، وەزیری دارایی عێراق.

زانیاریی تایبەت: بەرپرسێکی باڵا لە حکومەتی عێراق بە ئاڤا ڕاگەیاند: "لە سبەی سێشەممەوە ڕێکارە کارگێڕی و بانکییەکان بۆ ناردنی مووچە دەستپێدەکەن، ئەم پرۆسەیە لانی کەم پێنج ڕۆژی دەوێت، بۆیە بە ئەگەری زۆرەوە پارەکە لە سەرەتای هەفتەی داهاتوو دەگاتە هەرێمی کوردستان."

زانیاریی زیاتر: بڕیارە سبەی سێشەممە ئەنجوومەنی وەزیرانی عێراق کۆببێتەوە؛ یەکێک لە تەوەرەکانی کۆبوونەوەکە تایبەتە بە "پاکتاوی ژمێریاری" (تەسفیە حیساب)ی نێوان هەولێر و بەغدا و ڕاپۆرتی تیمی دیوانی چاودێریی دارایی.

ئەمەش بزانە: وەزیرە کوردەکان لە بەغدا بەنیازن داوا لە محەممەد شیاع سوودانی بکەن ئەو تەوەرە لە کارنامەی کۆبوونەوەکە دەربهێنرێت، چونکە پێیان وایە بابەتەکە پێشتر چارەسەر کراوە؛ هەم نەوت هەناردە دەکرێت و هەم داهاتی ناوخۆش نێردراوە، بۆیە پێویست ناکات جارێکی دیکە پرۆسەی ناردنی مووچە بەو دۆسیەیە کۆسپ بۆ دروست بکرێت.