چوارچێوەی هەماهەنگی کۆبووەوە و کاندیدی سەرۆکوەزیرانی بۆ یەکلایینەکرایەوە

ئاڤا نیوز

 

ئەمشەو جارێکی دیکە سەرکردەکانی چوارچێوەی هەماهەنگی کۆبوونەوە و کاندیدی پۆستی سەرۆکوەزیرانیان بۆ یەکلایینەکرایەوە، بەڵام ڕایانگەیاند، جەخت لە هەڵوێستی نەگۆڕیان بۆ هێشتنەوەی چەک تەنیا لە دەستی دەوڵەتدا دەکەنەوە.

 

ئەوەی پێویستە بیزانیت: ئەمشەو سەرکردەکانی چوارچێوەی هەماهەنگی لە نووسینگەی هومام حەمودی، سەرۆکی ئەنجوومەنی باڵای ئیسلامی عێراق کۆبوونەوە و تێیدا میکانیزمەکانی هەڵبژاردنی ئەو کەسایەتییەی کە پۆستی سەرۆکایەتی حکومەتی داهاتووی عێراق وەردەگرێت، تاوتوێ کرد.

 

ڕاگەیێنراوی فەرمی: سەرکردەکانی چوارچێوەی هەماهەنگی شیعەکان ئەمڕۆ دووشەممە کۆبوونەوە و ئاماژەیان بەوەشکرد، لە کۆبوونەوەکەدا نامە و دەستپێشخەریی هێزەکانی ناو هاوپەیمانێتییەکە بە وردی تاوتوێکرا کە بە ئاڕاستەی پەلەکردن لە یەکلاییکردنەوەی کاندیدی سەرۆکوەزیران لە وادەی دەستووری دیارییکراودا پێشکەش کرابوون.

 

ئەوەشی خستووەتەڕوو، جەخت لە هەڵوێستی نەگۆڕیان بۆ هێشتنەوەی چەک تەنیا لە دەستی دەوڵەتدا دەکەنەوە، ئەویش بەگوێرەی پڕۆژەیەکی نیشتیمانی و ڕێکاری یاسایی ڕوون، ئەم هەنگاوەش بەجۆرێک دەبێت سەروەریی وڵات و ئاسایش و ئارامییەکەی بپارێزێت.

 

باکگراوند: ئەم جموجوڵانەی چوارچێوەی هەماهەنگی لە کاتێکدایە کە هێزە سیاسییەکان هەوڵ دەدەن دەستنیشانکردنی سێ سەرۆکایەتییەکە کۆمار، وەزیران، پەرلەمان یەکلایی بکەنەوە، بەتایبەت بڕیارە ڕۆژی 29ی ئەم مانگە کانوونی یەکەم یەکەم دانیشتنی خولی نوێی ئەنجومەنی نوێنەران بەڕێوەبچێت، دوای ئەوەی سەرۆککۆمار داوای کردبوو لەو وادەیەدا پەرلەمان کۆببێتەوە.