لە ماوەی 73 ڕۆژی ئاگربەستدا؛ ئیسرائیل 411 فەڵەستینیی لە کەرتی غەززە کوشتووە

ئاڤا نیوز

حکومەتی کەرتی غەززە ڕایگەیاند، سوپای ئیسرائیل لە ماوەی 73 ڕۆژی ئاگربەستدا 885 جار ڕێککەوتنەکەی پێشێل کردووە؛ لە ئەنجامی ئەو پێشێلکارییانەشدا 411 فەڵەستینی کوژراون و هەزار و 112 کەسی دیکەش بریندار بوون.

وێنە گەورەکە: ڕێککەوتنی ئاگربەستی غەززە لە 10-10-2025ـەوە کەوتووەتە بواری جێبەجێکردنەوە، بەڵام سەرەڕای تێپەڕبوونی 73 ڕۆژ، ئیسرائیل بەردەوامە لە ئەنجامدانی هێرش و پێشێلکاریی سەربازی. لەو ماوەیەدا جگە لە کوژرانی سەدان هاووڵاتی، ئیسرائیل چەندین سەرکردەی دیاری حەماسیشی کردووەتە ئامانج.

ڕاگەیێنراوی فەرمی: نووسینگەی ڕاگەیاندنی حکومی لە کەرتی غەززە وردەکاریی پێشێلکارییەکانی بڵاوکردەوە کە بریتین لە:

تەقەی ڕاستەوخۆ: 265 جار.

بۆردوومانکردنی مەدەنییان: 421 جار.

ڕووخاندنی ماڵ و دامەزراوەکان: 150 جار.

چوونە ناو ناوچەی نیشتەجێبوون: 49 جار.

هەروەها ئاماژە بەوە کراوە کە لەو ماوەیەدا 45 فەڵەستینی لە لایەن هێزەکانی ئیسرائیلەوە دەستگیر کراون.

ژمارەکان وا دەڵێن: لە ماوەی زیاتر لە دوو ساڵی جەنگی غەززەدا، ئیسرائیل زیاتر لە 70 هەزار فەڵەستینیی کوشتووە و 171 هەزار کەسی دیکەش بریندار بوون؛ هاوکات 90%ی باڵەخانە و ژێرخانی کەرتی غەززە بە تەواوی خاپوور کراون.