واشنتن: تاران "بە تەواوی لە پەیامی هێرشەکان تێنەگەیشتووە"

ئاڤا نیوز

هۆشدارییەکانی ئەمریکا و ئیسرائیل لەبارەی هەوڵەکانی ئێران بۆ بنیادنانەوەی توانا مووشەکی و ئەتۆمییەکانی لە هەڵکشاندایە؛ باڵیۆزی ئەمریکا لە ئیسرائیلیش دەڵێت، تاران هێشتا لە پەیامی هێرشەکان تێنەگەیشتووە.

وێنە گەورەکە: واشنتن و تەلئەڤیڤ بە وردی چاودێریی جموجۆڵەکانی ئێران دەکەن، بەتایبەت دوای ئەوەی ڕاپۆرتە هەواڵگرییەکان ئاماژە بەوە دەکەن کە تاران سەرقاڵی چاککردنەوە و بنیادنانەوەی ئەو دامەزراوە ئەتۆمی و سەربازییانەیە کە پێشتر لە هێرشەکاندا زیانیان بەرکەوتبوو.

لێدوانی فەرمی: مایک هاکابی، باڵیۆزی ئەمریکا لە ئیسرائیل، لە وەڵامی پرسیارێکدا سەبارەت بە هەوڵەکانی تاران بۆ بەهێزکردنەوەی دامەزراوەکانی ڕایگەیاند: "هیوادارم تاران لە پەیامەکە تێگەیشتبێت، بەڵام پێدەچێت بە تەواوی لێی تێنەگەیشتبن؛ چونکە هەوڵ دەدەن ئەو شوێنانە دووبارە بنیاد بنێنەوە و ڕێگەی نوێ بدۆزنەوە بۆ پاراستنی دامەزراوەکانیان."

ئەوەی لەبارەیەوە دەگوترێت: ڕاپۆرتە نێودەوڵەتییەکان جەخت لەوە دەکەنەوە کە تاران سەرەڕای فشارەکان، ستراتیژیی خۆی نەگۆڕیوە و بەردەوامە لە گەڕان بەدوای ڕێگەی جیاوازدا بۆ پاراستنی بەرنامە ئەتۆمی و مووشەکییەکەی لە هێرشی داهاتوو.

ئەوەی پێویستە بیزانیت: بڕیارە ڕۆژی 29-12-2025، بنیامین نەتانیاهۆ، سەرۆکوەزیرانی ئیسرائیل، لە میامی لەگەڵ دۆناڵد ترەمپ کۆببێتەوە. تەوەرێکی سەرەکیی کۆبوونەوەکە تایبەت دەبێت بە داڕشتنی پلانێکی هاوبەش بۆ مامەڵەکردن لەگەڵ "هەڕەشەکانی ئێران" لە قۆناغی داهاتوودا.