ترەمپ جارێکی دیکە داوای گرینلاند دەکاتەوە

ئاڤا نیوز

دۆناڵد ترەمپ، سەرۆکی ئەمریکا، جارێکی دیکە جەختی لە خواستەکەی بۆ بەدەستهێنانی دوورگەی "گرینلاند" کردەوە و دەڵێت، ئەم هەنگاوە تەنیا بۆ پاراستنی ئاسایشی نیشتمانیی وڵاتەکەیەتی.

لێدوانی فەرمی: دۆناڵد ترەمپ ڕایگەیاند، کڕینی گرینلاند تەنیا بۆ مەبەستی "ئاسایشی نیشتمانییە" و ئەوەی ڕەت کردەوە کە لەبەر کانزا و سەرچاوە سروشتییەکان بێت. ئاماژەی بەوەش کرد، بوونی کەشتییە ڕووسی و چینییەکان لە کەناراوەکانی گرینلاند مەترسییە بۆ سەر ئەمریکا.

ئەمەش بزانە: سەرۆکی ئەمریکا لە هەنگاوێکی کردەییدا، "جێف لاندری"، پارێزگاری ویلایەتی لویسیانای وەک نێردەی تایبەتی ئەمریکا بۆ کاروباری گرینلاند دەستنیشان کردووە. لاندری ڕایگەیاندووە کە کار دەکات بۆ ئەوەی گرینلاند ببێتە "بەشێک لە خاکی ئەمریکا".

کاردانەوەکان: ئەم لێدوانانە تووڕەیی توندی کۆپنهاگنی لێکەوتەوە؛ میتی فریدریکسن، سەرۆکوەزیرانی دانیمارک و جێنس فرێدریک نیڵسن، سەرۆکوەزیرانی گرینلاند لە ڕاگەیێنراوێکی هاوبەشدا ڕایانگەیاند: "گرینلاند بۆ فرۆشتن نییە؛ ئەم دوورگەیە تەنیا بۆ گرینلاندییەکانە و بە ئەمریکاوە نالکێنرێت."