چوارچێوەی هەماهەنگی بۆ ئاڤا: بۆ پۆستی سەرۆکوەزیران تەنیا چوار کەس کاندیدن

ئاڤا نیوز

 

سەرکردەیەکی چوارچێوەی هەماهەنگی شیعەکان کە بە نزیکەی 180 کورسییەوە خاوەنی گەورەترین فراکسیۆنی پەرلەمانی عێراقن، بە ئاڤا میدیای ڕاگەیاند، سەرکردەکانی چوارچێوەی هەماهەنگی لەسەر ڕێکارەکان و تایبەتمەندییەکانی ئەو کەسەی دەبێتە سەرۆکوەزیران ڕێککەوتوون، ئێستاش تەنیا سێ بۆ چوار کاندید بۆ ئەو پۆستە هەیە و لە ماوەی دەستووری دیاریکراودا یەکلایی دەکەنەوە.

 

وێنە گەورەکە: دوێنێ جارێکی دیکە سەرکردەکانی چوارچێوەی هەماهەنگی کۆبوونەوە، لە کۆبوونەوەکەدا هەرچەندە شیعەکان کاندیدی پۆستی سەرۆکوەزیرانیان بۆ یەکلایی نەکرایەوە، بەڵام ڕێککەوتن لەسەر ئەوەی لە یەکلاییکردنەوەی ئەم پۆستەدا پەلە بکەن.

 

لێدوانی فەرمی: دکتۆر عەبدولحوسێن موسەوی، سەرۆکی هاوپەیمانیی نەهجی وەتەنی و یەکێک لە سەرکردەکانی چوارچێوەی هەماهەنگی، دوای کۆبوونەوەی لەگەڵ شاندی دانوستانکاری پارتی دیموکراتی کوردستان بۆ پێکهێنانی حکومەتی عێراق بە سەرۆکایەتیی فازڵ میروانی، بە ڕۆژنامەنووسانی ڕاگەیاند، ئومێدەوارن و کاریش بۆ ئەوە دەکەن هەڵبژاردنی سەرۆکایەتییەکان و پێکهێنانی حکومەت لەماوەی دەستووری دیاریکراودا تەواو بکرێن، بۆ ئەم بابەتەش ڕێککەوتن هەیە و ئومێدەوارن پارتی و یەکێتیش بە یەک کاندیدی هاوبەش بێنە کۆبوونەوەی هەڵبژاردنی سەرۆککۆمار.

 

لەبارەی کاندیدی سەرۆکوەزیران و هەوڵەکانیش بۆ یەکلایی کردنەوەی ئەم پۆستە لەناو شیعەکاندا، عەبدولحوسێن موسەوی وەڵامی پرسیارێکی دەروون مەلا ناجی، پەیامنێری ئاڤای لە بەغدا دایەوە و ڕایگەیاند، چوارچێوەی هەماهەنگی ڕێکار و تایبەتمەندییەکانی بۆ کاندیدی پۆستی سەرۆکوەزیران یەکلایی کردووەتەوە و لەسەر ئەم بابەتە هیچ کێشەیەکیان نییە، لەم کاتەشدا تەنیا سێ بۆ چوار کاندید بۆ پۆستی سەرۆکوەزیران هەن.