عێراق هەڵمەتێکی هۆشیاریی "کێشانەوەی پارە" لە زانکۆ و قوتابخانەکان دەست پێ دەکات

ئاڤا نیوز

 

وەزارەتی ناوخۆی عێراق دەڵێت، لە قوتابخانە و زانکۆکان هەڵمەتێکی هۆشیاریی فراوان بۆ ڕووبەڕووبوونەوەی کێشانەوە و بەدەستهێنانی پارە بەڕێگەی ساختە و نایاسایی دەستپێکردووە، ئەویش بە ئامانجی پاراستنی پارەی هاووڵاتیان و ئاسایشی ئابووری و ئەلیکترۆنیی وڵات.

 

وێنە گەورەکە: لەگەڵ فراوان بوونی پرۆسەی بەئەلیکترۆنیکردنی سەرجەم بوارەکانی ژیان، تاوانی کێشانەوە یان بەدەستهێنانی پارە بەشێوەی نایاسایی لە هاووڵاتیانیش بەتایبەت لەڕێگەی تۆڕە کۆمەڵایەتییەکان زیادی کردووە، مانگی ڕابردووش دەزگای هەواڵگریی عێراق ئاشكرای کرد لە تۆڕە کۆمەڵایەتییەکان و بەناوی بانکی ناوخۆیی و بیانییەوە، هاووڵاتیان هەڵدەخەڵەتێنرێن و بەناوی قەرز و وەبەرهێنانەوە پارە و زانیارییەکان دەبردرێت.

 

لێدوانی فەرمی: عەمید ئەحمەد عوبێد، وتەبێژی دەزگای هەواڵگریی عێراق ئەمڕۆ چوارشەممە بە ڕۆژنامەی سەباحی ڕاگەیاندووە، بەهاوکاریی ڕێکخراوەکانی کۆمەڵگەی مەدەنی، بەرنامەیەکی هۆشیاریی فراوانیان لە قوتابخانە و زانکۆکان دەستپێکردووە و تیایدا تاوانە ئەلیکترۆنییەکان و چۆنییەتی خۆپاراستن لە کێشانەوەی پارە بەشێوەی نایاسایی بۆ گەنجان ڕوون دەکەنەوە.

 

-هەڵمەتەکە هاوکاتە لەگەڵ زیادبوونی ڕۆڵی پێگە ئەلیکترۆنی و تۆڕە کۆمەڵایەتییەکان لە ژیانی هاووڵاتیان و هۆشیاری لەبارەی ڕێگاکانی تاوانە ئەلیکترۆنییەکان دەتوانێت ئاستی هەڵخەڵەتاندنی هاووڵاتیان و بەهەدەرچوونی پارەکانیان کەم بکاتەوە، هەڵمەتەکە چۆنییەتی ڕووبەڕوبوونەوەی بێزار کردنی ئەلیکترۆنی و بڵاو کردنەوەی ناوەڕۆکی خراپیش لە تۆڕە کۆمەڵایەتییەکان لە خۆدەگرێت.