نزیكەی 12 هەزار كتێب بۆ ئاوەدانكردنەوەی كتێبخانەی گشتیی چەمچەماڵ نێردراوە

ئاڤا نیوز

 

دوای ئەوەی لافاو زیانی بە بەشێکی زۆری کتێبخانەی چەمچەماڵ گەیاند، تا ئێستا نزیكەی 12 هەزار كتێب بۆ ئاوەدانكردنەوەی كتێبخانەی گشتیی چەمچەماڵ نێردراوە، بەڕێوەبەری كتێبخانەكەش دەڵێت، كەسانێكی زۆر پەیوەندییان كردووە كە لە ڕۆژانی داهاتوودا كتێبەكانیان بگەیێنن.

 

وێنە گەورەکە: لەپێناو دووبارە ئاوەدانکردنەوەی كتێبخانەی چەمچەماڵ، هەڵمەتێكی فراوانی كۆكردنەوەی كتێب لە سەرانسەری هەرێمی كوردستان دەستیپێكردووە.

 

لێدوانی فەرمی: هێرش عەبدولڕەحمان، بەڕێوەبەری كتێبخانەی گشتیی چەمچەماڵ بە ئاڤای ڕاگەیاند، لە دەستپێكی هەڵمەتی ئاوەدانكردنەوەی كتێبخانەكە تاوەكو ئێستا نزیكەی 12 هەزار كتێب كۆكراوەتەوە، كەسان و لایەنێكی زۆری دیكەش پەیوەندییان پێمانەوە كردووە كە لە ڕۆژانی داهاتوودا كتێبەكانیان بگەیێنن.

 

بەڕێوەبەری كتێبخانەی گشتیی چەمچەماڵ ڕاشیگەیاند، ئێستا كتێبخانەكە پاككراوەتەوە، چاوەڕێی ناوەندی كوردستان بۆ هونەر و كولتوورین، نۆژەنكردنەوەی بینای كتێبخانەكە دەستپێبكەن.

 

ئەوەی پێویستە بیزانیت: لە لافاوەكەی سنووری چەمچەماڵ، نزیكەی 60%ـی كتێبەكانی نێو كتێبخانەی گشتیی شارەكە لەناوچوون، بەكۆی گشتی، كتێبخانەكە 22 هەزار كتێبی تێدابووە، جگە لەوەش نزیكەی حەوت هەزار ڕۆژنامە و گۆڤاری تێدابووە. 

 

پەیوەست بەم بابەتە: ئەمڕۆ پێنجشەممە زانكۆی سۆران بە بەخشینی هەزار كتێب بەشداری لە هەڵمەتی ئاوەدانكردنەوەی كتێبخانەكە كرد. ئەمەش وەك دەربڕینی هاوخەمی بۆ خەڵكی چەمچەماڵ بەگشتی و ئاوەدانكردنەوەی ژێرخانی مەعریفی شارەكە بەتایبەت.

 

باکگراوند: ڕۆژی 9ـی ئەم مانگە لافاوێکی كارەساتبار سنووری چەمچەماڵی گرتووە، بەهۆیەوە زیانێكی زۆر بە كتێبخانەی گشتیی شارەكە گەیشت و هەزاران سەرچاوەی زانستی و كتێبی بەنرخ لەناچوون.