شاندى باڵای پارتی لە سێ ڕۆژدا 16 کۆبوونەوەیان لە بەغدا کردووە

ئاڤا نیوز

 

دوای سێ ڕۆژ مانەوەیان لە بەغدا، شاندی باڵای پارتی 16 کۆبوونەوەیان لەگەڵ کەسایەتی و لایەنە سیاسییەکانی عێراق کرد و بڕیارە ئەمشەو بگەڕێنەوە هەرێمی کوردستان.

 

چیرۆکی سەرەکی: ماوەی سێ ڕۆژە شاندێكی باڵای پارتی بەسەرۆکایەتیی فازڵ میرانی و ئەندامیەتیی هەریەکە لە د.فوئاد حوسێن، نەوزاد هادی، د. ئومێد سەباح و فارس عیسا، لە بەغدان. لەبارەی پرسەكانی؛ پێکهێنانی ئەنجوومەنی فیدراڵی، پەسندکردنی یاسای نەوت و غاز، زامنکردنی مووچە و بەشە بودجەی هەرێمی کوردستان لە ساڵی نوێ و پێكهێنانی كابینەی نوێی حكومەتی فیدڕاڵ؛ گفتوگۆ کراوە.

 

زانیاریی پەیامنێر: دەروون مەلا ناجی، پەیامنێری ئاڤا لە بەغدا گوتی، ئەمڕۆ شاندەکەی پارتی كۆبوونەوەیەكی ناوخۆییان لەگەڵ ڕێکخستنەکانی حیزبەكە لە بەغدا کردووە، دواتر دەستییان بە سەردانی لایەنە سیاسییەکان کردووە و لە یەكەم وێستگەشدا، سەردانی کۆنگرەی نیشتیمانیی عێراقیان کرد و لەگەڵ  ئاراس حەبیب كەریم، ئەمینداریی گشتیی حیزبەکە کۆبوونەوە. هەر ئەمڕۆ لەگەڵ فایەق زێدان، سەرۆکی ئەنجوومەنی باڵای دادوەری عێراق لە بەغدا کۆبوونەوە، چەند پرسێكی یاسایی و دەستوورییان تاوتوێ كردووە. دوایین سەردانیشیان بۆلای کاردیناڵ لویس ڕافایل ساکۆ، پاتریاکی کلدانەکانی عێراق و جیهان بووە.

 

وردەكاریی كۆبوونەوەكانی شاندی پارتی لە بەغدا:

لە ڕۆژی یەكەمدا 8 كۆبوونەوەیان ئەنجامدا لەگەڵ هەریەک لە: 
- د. لەتیف ڕەشید، سەرۆککۆماری عێراق
- نووری مالیکی، سەرۆکی هاوپەیمانیی دەوڵەتی یاسا
- موسەننا سامەڕایی، سەرۆکی هاوپەیمانیی عەزم
- عەممار حەکیم، سەرۆکی ڕەوتی حیکمە
- د. حوسێن موسەوی، سەرۆکی هاوپەیمانیی نەهجی نیشتمانی
- هومام حەموودی، سەرۆکی ئەنجوومەنی باڵای ئیسلامیی عێراق
- محەممەد شییاع سوودانی، سەرۆکی هاوپەیمانیی ئاوەدانکردنەوە و گەشەپێدان و سەرۆكوەزیرانی ئێستای عێراق
- خەمیس خەنجەر، سەرۆکی هاوپەیمانی سیادە

 

لە ڕۆژی دووەمدا 5 كۆبوونەوەیان ئەنجامدا لەگەڵ هەریەک لە:

- هادی  عامری، سەرۆكی ڕێكخراوی بەدر
- قەیس خەزعەلی، ئەمینداری گشتیی عەسائیبی ئەهلی هەق
- موحسین مەندەلاوی، سەرۆکی هاوپەیمانیی ئەلئەساس و جێگری یەکەمی سەرۆکی پەرلەمان
- حەیدەر عەبادی، سەرۆکی هاوپەیمانیی نەسر
- ئەحمەد جبوری، سەرۆکی حیزبی جەماهیر ئەلوەتەنیە

 

لە ڕۆژی سێیەم و كۆتایی 3 كۆبوونەوەیان ئەنجامدا لەگەڵ هەریەک لە:

- ئاراس حەبیب كەریم، ئەمینداریی گشتیی کۆنگرەی نیشتیمانیی عێراق
- فایەق زێدان، سەرۆکی ئەنجوومەنی باڵای دادوەریی عێراق
- کاردیناڵ لویس ڕافایل ساکۆ، پاتریاکی کلدانەکانی عێراق و جیهان.