هۆشداری بە گرووپەکانی شاخەوانی دەدرێت

ئاڤا نیوز

 

بەهۆی ئەم شەپۆلی باران و بەفربارینەی کوردستانی گرتووەتەوە هۆشداری بە شاخەوانان و گرووپەکانی شاخەوانی دەدرێت سەرکێشی نەکەن و پابەندی ڕێنماییەکانی بەرگریی شارستانی و شاخەوانی بن.

 

وێنە گەورەکە: لە ئێستادا شەپۆلێکی باران و بەفربارینی چڕ هەرێمی کوردستانی گرتووەتەوە، ئەگەری ئەوە هەیە لەکاتی شاخەوانی و گەشتکردن بۆ چیا بەرزەکانی کوردستان ژیانی ئەو هاونیشتمانییانە بکەوێتە مەترسییەوە کە ڕوو لە شاخ و زنجیرە چیا بەرزەکان دەکەن.

 

لێدوانی فەرمی: ئازاد گەردی، سەرۆکی ڕێکخراوی شاخەوانیی هەڵۆ، بە ئاڤای گوت: بۆ گەشتی شاخەوانی لە وەرزی زستان ژمارەیەک مەرج و ڕێنمایی هەن دەبێت لەبەرچاو بگیرێن و جێبەجێ بکرێن، ڕێنماییە سەرەکییەکان ئەمانەن:

- پێویستی لە ئەپلیکەیشن و پەیجە جیهانییە باوەڕپێکراوەکان وردەکاری تەواوی کەشوهەوا وەربگیرێت.

-  دەبێت لانیکەم 48 کاتژمێر بەسەر بارینی بەفر تێپەڕیبێت.
-  نابێت کاتێک گەشت بکرێت کە پلەکانی گەرما زۆر داببەزێت.
-  دەبێت ڕەچاوی بەرزی شاخەکان و ڕێژەی ئۆکسجین بکرێت.
-  لەکاتی هەورەتریشقە نابێت بەهیچ جۆرێک گەشت بکرێت.
-  نابێت گەشت بۆ دۆڵەکان و ئەو شوێنانە بکرێت مەترسی ڕەنووی بەفر و داڕمانی شاخیان لێدەکرێت.
- دەبێت بە گوێرەی گەشتەکان خواردنی تایبەت و سەرجەم کەلوپەل و پێداویستییە تەکنیکییەکانی گەشت ئامادە بکرێت و شەواخەوانان هەموو ئەو شتانەیان لەلا بێت.
-    دەبێت پێڵاو و جلوبەرگ تایبەتی شاخەوانی لە وەرزی زستان بپۆشرێت.

 

لە لایەکی دیکەوە: سەرکەوت کاڕەش، گوتەبێژی بەرگریی شارستانیی هەرێمی کوردستان بە ئاڤای گوت: داوا لە گرووپەکانی شاخەوانی دەکەین هەر کاتێک دۆخی کەشوهەوا لەبار نەبێت، بەتایبەت بەفر ببارێت و پلەکانی گەرما زۆر داببەزن، بەهیچ جۆرێک گەشتی شاخەوانی ئەنجام نەدەن، چونکە لە بارودۆخی ئاوا هەرکەسێک لە ناوچەیەکی شاخاوی گیربخوات ڕزگارکردنی زۆر قورس دەبێت.

 

مەترسییە پێشبینیکراوەکان: ئەنجامدانی گەشتی شاخەوانی لە کەشوهەوای نالەبار چەندین مەترسی لێ دەکەوێتەوە، وەک گیربوون لەناو بەفر، ڕەنووی بەفر، تێكچوونی ڕێگا و چەندین مەترسی دیکە کە ڕەنگە گیانی شاخەوانان بخاتە مەترسییەوە.