خولی شەشەمی پەرلەمانی عێراق یەکەم دانیشتن سازدەکات و بەشێک لە پۆستەکان یەکلاییکرانەوە

ئاڤا نیوز

 

بڕیارە ئەمڕۆ دووشەممە، یەکەم دانیشتنی خولی شەشەمی پەرلەمانی عێراق ساز بکرێت و دەنگ لەسەر کاندیدەکانی سەرۆکی پەرلەمان و هەردوو جێگرەکەی بدرێت، ئەمەش لە کاتێکدایە بەشێک لە لایەنەکان بە ڕاستەوخۆ و ناڕاستەوخۆ کاندیدیان بۆ پۆستەکان ئاشکرا کردووە.

 

وێنە گەورەکە: لە کاتێکدا لایەنە سیاسییەکان لەسەر هیچکام لە کاندیدەکانی پۆستەکانی سەرۆکی پەرلەمان و دوو جێگرەکەی ڕێکنەکەوتوون، ئەمڕۆ دووشەممە، ئەندامانی پەرلەمان سوێندی یاسایی دەخۆن و بەپێی دەستوور پابەندن بە هەڵبژاردنی ئەندامانی دەستەی سەرۆکایەتیی پەرلەمان.

 

ڕاگەیێنراوی فەرمی: پەرلەمانی عێراق ڕایگەیاندووە، ئەمڕۆدووشەممە کاتژمێر 12:00ـی نیوەڕۆ دانیشتنەکە دەستپێدەکات، سەرەتا ئەندامانی پەرلەمان سوێندی یاسایی دەخۆن و بە فەرمی وەکو پەرلەمانتارانی خولی شەشەم دەستبەکار دەبن و دواتر کاندیدەکانی سەرۆکایەتی و جێگری یەکەم و دووەم دەخرێنە دەنگدان و هەڵدەبژێردرێن.

 

زانیاریی زیاتر: لایەنە سوننەکان پۆستی سەرۆکی پەرلەمانیان بەردەکەوێت بە دوو کاندید دێنە نێو دانیشتنەکە کە هەیبەت حەلبووسی، کاندیدی زۆربەی لایەنە سوننەکانە، جگە لە هاوپەیمانیی عەزم کە موسەننا سامەڕایی سەرۆکی هاویەپمانێتییەکەی کاندید کردووە، پۆستی جێگری یەکەمی سەرۆکی پەرلەمان بۆ شیعەکانە و چەند بەربژێرێکیان هەیە هاوکات جێگری دووەم بۆ کوردە و شاخەوان عەبدوڵڵا، ئەندامی فراکسیۆنی پارتی دیموکراتی کوردستان کاندیدە.