هەسەدە: سەردانی مەزڵووم عەبدی بۆ دیمەشق دواخرا

ئاڤا نیوز

ناوەندی ڕاگەیاندنی هێزەکانی سووریای دیموکرات (هەسەدە) ڕایگەیاند، بڕیار بوو ئەمڕۆ دووشەممە، مەزڵووم عەبدی سەردانی دیمەشق بکات، بەڵام بەهۆکارێکی تەکنیکی سەردانەکە دواخراوە.

 

چیرۆکی سەرەکی: ئەگەرچی چەند ڕۆژ لەمەوبەر بڵاوکرایەوە مەزڵووم عەبدی سەردانی دیمەشقی کردووە، بەڵام ئاڤا ئەو کاتە لە سەرچاوەیەکەوە ئەوەی ئاشکرا کرد، سەردانەکە دواخراوە.

 

ڕاگەیانراوی فەرمی: ئەمڕۆ دووشەممە، هەسەدە لە ڕاگەیێنراوێکدا ئاشکرای کرد، بڕیار بوو ئەمڕۆ 29ـی مانگ مەزڵووم عەبدی، فەرماندەی گشتیی هێزەکانی سوریای دیموکرات لەگەڵ شاندی دانوستانکاری باکوور و ڕۆژهەڵاتی سوریا سەردانی دیمەشق بکەن، بەڵام بە هۆکاری تەکنیکی سەردانەکە دواخراوە. دواتر وادەیەکی نوێ دیاری دەکرێت، کە هەموو لایەنە پەیوەندیدارەکان لەسەری ڕێکبکەون.

 

زانیاریی زیاتر: لە ڕاگەیێنراوەکەی هەسەدە ئاماژە بەوە دراوە، دواخستنی سەردانەکە پەیوەندی بە ڕێکخستنی لۆجستی و تەکنیکییەکان هەیە و هیچ گۆڕانکارییەک لە ڕەوتی پەیوەندییەکان یان ئامانجەکانی گفتوگۆکان ڕووینەداوە.

 

باکگراوند: ڕۆژی 10ـی مانگی سێی ئەمساڵ ڕێککەوتنێک لەنێوان مەزڵوم عەبدی و ئەحمەد شەرع واژۆکرا، بەڵام تا ئێستا هیچ یەک لە خاڵەکانی ئەو ڕێککەوتنە جێبەجێ نەکراوە و دانیشتنەکان بەو ئاراستەیەن ڕێککەوتنێکی نوێ واژۆ بکرێت.