کەشناسی هەرێم بۆ مووچەخۆران: بەشەو مووچەکانتان وەرمەگرن

ئاڤا میدیا

 

بەهۆی ئەو شەپۆلە بەفر و بارانبارینەی ڕووی لە ناوچەکانی هەرێمی کوردستان کردووە، پلەکانی گەرما بە ڕێژەیەکی بەرچاو دابەزیووە، بەڕێوەبەرایەتیی گشتیی کەشناسی و بومەلەرزەزانیش هۆشداریی بە مووچەخۆران دەدات.

 

وێنە گەورەکە: ڕۆژی یەکشەممە، وەزارەتی دارایی عێراق بڕی 942 ملیار و 845 ملیۆن دیناری مووچەی خستە سەر هەژماری بانکی وەزارەتی دارایی و ئابووریی حکومەتی هەرێمی کوردستان لە لقی بانکی ناوەندی لە هەولێر.

 

لێدوانی فەرمی: فازڵ ئیبراهیم، بەڕێوەبەری گشتیی کەشناسی و بومەلەرزەزانی هەرێمی کوردستان بە ئاڤا میدیای ڕاگەیاند: پێویستە مووچەخۆران ئەمڕۆ تاوەکو دەمەو عەسر بچن مووچەکانیان وەربگرن، چونکە شەو پلەکانی گەرما لە هەندێک شوێن بۆ سفر و لە هەندێک جێگەی دیگەش بۆ ژێر سفر دادەبەزێت، بۆیە گونجاو نابێت لە ماڵەکانیان بچنە دەرەوە.

 

لەلایەکی دیکەوە: بەڕێوەبەری گشتیی کەشناسی دەڵێت: بۆ ڕۆژی سێشەممەش، پێویستە مووچەخۆران لە کاتژمێر 12:00ی نیوەڕۆوە بچن بۆ وەرگرتنی مووچەکانیان، ئەو کاتە کەش ئاسایی دەبێتەوە، بەڵام دیسان نابێت شەو بچن و پلەی گەرمی نزم دەبێتەوە.

 

زانیاریی بەدەستهاتوو: بۆ مووچەی ئەم مانگە 630 هەزار مووچەخۆر لە ڕێگەی هەژماری من مووچە وەردەگرن، کە 330 هەزار فەرمانبەری مەدەنی، 197 هەزار پێشمەرگە و ئاسایش، 88 هەزار خانەنشین و 11 هەزار کەسوکاری شەهید.

 

ژمارەکان وادەڵێن: ئەو 630 هەزار مووچەخۆرە بەمشێوەیە بەسەر پارێزگاکاندا دابەش بوون:-

هەولێر: 319 هەزار و 500 مووچەخۆر

دهۆک: 164 هەزار و 300 مووچەخۆر

سلێمانی: 144 هەزار مووچەخۆر

 

ئەمەش بزانە: تا ئێستا نزیکەی ملیۆنێک مووچەخۆر خۆیان لە هەژماری من تۆمارکردووە، 660 هەزار کارت دابەشکراون، هاوکات 517 ئامێری ڕاکێشانی پارە ATM لە 200 شوێنی جیاوازی شار و شارۆچکەکانی هەرێمی کوردستان دانراون، هەروەها بە گشتی مووچەخۆران لە سەرتاسەری هەرێمی کوردستان یەک ملیۆن و 114 هەزار و 63 کەسە.