پاریس هاوپەیمانەکانی ئۆکرانیا کۆدەکاتەوە

ئاڤا نیوز

 

دوای چڕبوونەوەی هەوڵەکانی ئاشتی بۆ کۆتایی هێنان بەشەڕی ڕووسیا و ئۆکرانیا و بەتایبەت دوای کۆبوونەوەکەی سەرۆکی ئەمریکا و ئۆکرانیا، دواتر وڵاتی فەرەنسا ئاشکرای دەکات کە سەرەتای مانگی داهاتوو جارێکی دیکە هاوپەیمانەکانی ئۆکرانیا کۆدەبنەوە.

 

چیرکی سەرەکی: ئیمانوێل ماکرۆن، سەرۆکی فەرەنسا لە تۆڕی کۆمەڵایەتی ئێکس ڕایگەیاند، لە سەرەتای مانگی یەکی ساڵی داهاتوو، کۆبوونەوەی هاوپەیمانانی کیێڤ لە پاریس بەڕێوەدەچێت و تاوتوێی ئەو گەرەنتییە ئەمنییانە دەکرێت کە لە چوارچێوەی ڕێککەوتنی ئاشتی لەگەڵ ڕووسیا بە ئۆکرانیا دەدرێن.

 

زانیاری زیاتر: ئەم ڕاگەیاندنەی فەرەنسا دوای کۆبوونەوەی نێوان زێلێنسکی و ترەمپ دێت کەتیایدا هەردوولا گەشبینی خۆیان بۆ چارەسەرێکی نزیک بۆ کۆتاییهێنان بەشەڕی ڕووسیا و ئۆکرانیا دەربڕی.

 

لەلایەکی دیکەوە: سەرەڕای ئەم گەشبینییە، هەندێک پرس بە ئاڵۆزی ماونەتەوە و یەکێک لەوانەش پرسی خاکە، ترەمپ خۆی دووپاتیکردەوە کە پرسی "دۆنباس" و دەستبەرداربوون لە خاکەکان پرسێکی ئاڵۆز و چارەسەرنەکراوە و داواکاری و مەرجێکی بنەڕەتییە بۆ مۆسکۆ.

 

زانیاریی پەیوەندیدار: لە دوایین کۆبوونەوەی وڵاتانی هەوپەیمانی ئۆکرانیا کە رۆژی 12ـی 11ـی 2025 ئەنجامدرا، ڤلادیمێر زێلێنسکی، سەرۆکی ئۆکرانیا بەشێوەی ئۆنلاین بەشداریی کرد و سەرکردەکانی 34 وڵاتی ئەوروپا و جیهان تیایدا ئامادەبوون.

 

باکگراوند: 24ی شوباتی 2022 هێرشی ڕووسیا بۆ سەر ئۆکرانیا دەستیپێکرد، بە گشتی هێرشەکان بۆ سەر شەش شاری گرنگ و ستراتیژیی بوون، کریمیا، بەشێک لە دۆنێتسک، خارکیڤ، خێرسۆن، لوهانسک، میکۆلایڤ و زاپۆریژیا لەلایەن سوپای ڕووسیاوە داگیرکراوە و بەگشتی ئۆکرانیا داوای پێنج هەزار کیلۆمەتر چوارگۆشەی نەخشەی وڵاتەکەی دەکاتەوە کە بەهۆی هێرشەکانی ڕووسیاوە داگیرکراون، بەڵام ڕووسیا فەرمانڕەوای بۆ دەستنیشانکردوون و وەکو هەرێمی سەربەخۆ بەڵام بەشێک لە خاکی ڕووسیا ناساندوونی و ئامادە نییە بیانگێڕێتەوە.