لەگەڵ دەستپێکردنی دانیشتنی پەرلەمان گۆڕانکارییەکان لەناکاو ڕوو دەدەن

ئاڤا نیوز

 

یەکەم دانیشتنی خولی شەشەمی پەرلەمانی عێراق دەستی پێکرد و بڕیارە بەپێی کارنامەی کۆبوونەوەکە دەنگ لەسەر کاندیدەکانی سەرۆکی پەرلەمان و هەردوو جێگرەکەی بدرێت لەگەڵ سوێند خواردنی ئەندامانی نوێ..

 

چیرۆکی سەرەکی: ڕۆژی 11-11-2025 هەڵبژاردنی پەرلەمانی عێراق بەڕێوەچوو بۆ دەستنیشانکردنی 329 ئەندامی نوێی پەرلەمانەکە، بڕیارە ئەمڕۆش سەرۆکایەتی پەرلەمان هەڵبژێردرێت بە دەنگی پەرلەمانتارە نوێیەکان، پاشان ڕێکارەکان بۆ دەستنیشانکردنی سەرۆکی نوێی ئەنجوومەنی وەزیران و سەرۆککۆمار دەستپێ دەکەن.

 

ئەوەی ئێستا دەگوزەرێت: سەرۆکی بە تەمەنی پەرلەمان دانیشتنەکە بەڕێوە دەبات و ئەمینداری گشتیی ئەنجوومەنی نوێنەران، لیستی ناوی کاندیدە براوەکانی هەڵبژاردنی خوێندەوە، بەمەبەستی دڵنیابوونەوە لە ژمارەی ئامادەبووانی کۆبوونەوەکە بۆ ئەوەی پرۆسەی سوێند خواردن دەستپێ بکات.

 

زانیاری زیاتر: چوارچێوەی هەماهەنگی عەدنان فەیحانی بۆ جێگری یەکەمی سەرۆکی پەرلەمانی عێراق دەستنیشانکردووە و پارتی دیموکراتی کوردستانیش کاندیدکردنی شاخەوان عەبدوڵڵای بۆ پۆستی جێگری دووەمی سەرۆکی ئەنجومەنی نوێنەران ڕاگەیاندووە.

 

لێدوانی فەرمی: ئیخلاس دلێمی، لە پارتی دیموکراتی کوردستان، ڕاگەیاندووە: ڕێککەوتن کراوە کە کاندیدی ئێمە بۆ پۆستی جێگری دووەمی سەرۆکی ئەنجوومەنی نوێنەران شاخەوان عەبدوڵڵا بێت، دەشڵێت، سەرۆکی فراکسیۆنی پارتی دیموکراتی کوردستان بۆ پەرلەمانی عێراق فەرهاد ئەتروشی دەبێت.

 

باکگراوند: کۆبوونەوەکەی ئەمڕۆی پەرلەمانی عێراق بڕیاربوو لە کاتژمێر 12:00 دەستپێ بکات، بەڵام زیاتر لە کاتژمێرێک لە کاتی دیاریکراوی خۆی دواکەوت، بە پێی ماددەی 55ی دەستووری هەمیشەیی عێراق، دەبێت ئەمڕۆ سەرۆکی پەرلەمان و دوو جێگرەکەی هەڵبژێردرێت.

 

 

 

ئەم هەواڵە نوێ دەکرێتەوە...