گرانبوونی دۆلار جیاوازیی بەهای دۆلاری شین و سپی بەرزکردەوە بۆ چوار هەزار دینار

ئاڤا نیوز

 

تا دێت جیاوازیی بەهای دۆلاری ڕەنگ شین و سپی زیاتر دەبێت، بازاڕ لە كڕینی دۆلاری سپی دوور دەكەوێتەوە، لەگەڵ گرانبوونی بەهای دۆلاریش، جیاوازیی بەهای ئەو دوو ڕەنگەی دۆلار گەیشتووەتە 4000 هەزار دینار.

 

ئەوەی پێویستە بیزانیت: دۆلاری شین لەڕووی چاپەوە، چەند ساڵێك لە دۆلاری سپی نوێترە، بەپێی زانیارییەكان لەهیچ شوێنێكی جیهان جیاوازی لەنێوان ئەو دوو ڕەنگە نییە و بەهای هەردووكیان هاوتایە، تەنیا لە بازاڕەكانی هەرێمی كوردستان و عێراق ئەو گرفتە هەیە.

 

هۆكارە زانراوەكان: د. مستەفا مەلا حەسەن، شارەزای ئابووری و پێشکەشکاری زەنگی بازاڕ لە ئاڤا میدیا، جیاوازی بەهای دۆلاری شین و سپی بۆ چەندین هۆكار دەگەڕێنێتەوە، لەوانە؛

- بە پلەی یەک گرانبوونی دۆلار لەم هەفتەیە هۆكارە.

- ترسانی خەڵک و بازاڕ لە وەرگرتنی دۆلاری سپی و خواستیان لەسەر دۆلاری شین لەكاتی كڕینی دۆلار هۆکارێکی دیکەیە.

- لەگەڵ پەیڕەوكردنی ڕێنماییەکانی 30 بە 70 لەكاتی كڕین و فرۆشتنی دۆلار بە دەفتەر، ئیدی بازاڕ ترسی لەوە هەیە کە ئەم ڕێکارانە توندتر بکرێن، ئەمەش هۆکارە بۆ دووررکەوتنەوە لە دۆلاری سپی.

- لە بەغدا كڕینی دەفتەر دۆلار (10.000$) نزیکە لە 95 بە 5، بۆیە ئەمە پێویستی بە چارەسەرێکی بەپەلە هەیە.