ئیدارەی سەربەخۆی سۆران: داوا لە هاونیشتمانیان دەکەین بۆ وێنەگرتن نەڕۆنە دەرەوە

ئاڤا نیوز 

 

لە ئیدارەی سەربەخۆی سۆران ئاستەنگیی هاتووچۆ دروست بووە و داوا لە هاووڵاتیان دەکرێت لە ماڵەکانیان بمێننەوە و بۆ وێنەگرتن نەیەنە دەرەوە.

 

وێنە گەورەکە:  شەپۆلێکی بەفر و بارانبارین هەرێمی کوردستانی گرتووەتەوە، بەشێکی ڕێگاوبانەکان بەهۆی بەفربارینی زۆرەوە داخراون و ئاستەنگیی زۆر بۆ هاتووچۆی شۆفیران دروست بووە، لەمبارەیەوە ئیدارەی سەربەخۆی سۆران داوا لە هاووڵاتیان و شوفێران دەکات، هاوکاریان بن و نەیەنە دەرەوە.

 

لێدوانی فەرمی: هەژار حەکیم، بەرپرسی ڕاگەیاندن و پەیوەندییەکانی ئیدارەی سەربەخۆی سۆران بە ئاڤا میدیای ڕاگەیاند، لە ڕێگا سەرەکییەکانی سۆران بەهۆی بارینی بەفری زۆرەوە، ئاستەنگیی هاتووچۆ دروست بووە، هەروەها لە ناو سەنتەری قەزای ناوەندیی ئیدارەی سۆران و زۆربەی سەنتەری قەزاکانی ئیدارەی سۆران هاتووچۆکردن ئەستەم بووە.

 

- وەکو ئیدارەی سەربەخۆی سۆران لە دوێنێ شەوەوە ئاگاداریی هاووڵاتیان و شۆفێران کراوەتەوە کە هاتووچۆکردنیان بۆ ناوچە شاخاوییەکان ڕابگرن و تیمەکانی شاخەوانیش نەچنە ئەو شوێنانە تاوەکوو ئەم شەپۆلی بەفربارینە کۆتایی دێت.

 

لەلایەکی دیکەوە: ئیدارەی سەربەخۆی سۆران لە ڕێگەی ئاڤا میدیاوە پەیامێک ئاراستەی هاووڵاتیان و شوفێران دەکات و داوا دەکات بۆ وێنەگرتن نەیەنە دەرەوە، تاوەکوو ئاستەنگی دروست نەبێت، لەهەمان کاتیشدا تیمەکانی بەرگریی شارستانی و هاتووچۆ بتوانن کارەکانی خۆیان ئەنجام بدەن.

 

زانیاریی زیاتر: بەهۆی بەفربارینەوە، ئاستەنگیی هاتووچۆکردن لە ڕێگای "سەربەرد بۆ سیدەکان، بێخاڵ، ڕواندز"، هەروەها سەنتەری قەزاکان بە قەزای ناوەندیی سۆرانیشەوە دروست بووە.

 

ئەمەش بزانە: تاوەکوو ئێستا هیچ ڕووداوێکی هاتووچۆ لە ئیدارەی سۆران بەهۆی بەفربارینەوە ڕووی نەداوە، بەرپرسی ڕاگەیاندنی ئیدارەی سۆران دەڵێت، "ئەگەر هاووڵاتیان هاوکارمان نەبن و بێنە دەرەوە، پێشبینی دەکەین ڕووداوی پێکدادان ڕووبدات".