هاوپەیمانان و هەسەدە مەشق لەسەر سیستەمی بەرگریی "C-RAM" دەکەن

ئاڤا نیوز

 

لە بنکەی شەددادی لادێکانی باشووری حەسەکە،  هێزەکانی هاوپەیمانیی نێودەوڵەتی بە هاوکاری لەگەڵ هێزەکانی سووریای دیموکرات (هەسەدە)، مەشقێکی سەربازیی تایبەتیان لەسەر سیستەمی بەرگریی "C-RAM" ئەنجام دا.

 

هۆکارە زانراوەکان: ئامانجی ئەم مەشقانە بەرزکردنەوەی ئاستی ئامادەیی هێزەکانی هەسەدە و بەهێزکردنی تواناکانیانە بۆ ڕووبەڕووبوونەوەی هەڕەشەی ئاسمانی، بەتایبەتی مووشەکی مەودا کورت و گوللە هاوەن. 

 

زانیاریی زیاتر: مەشقەکان تاقیکردنەوەی چەندین سیناریۆی گریمانەیی بۆ بەرپەرچدانەوەی هێرشی مووشەکی لەخۆگرتبوو، هاوکات لەگەڵ مەشقەکاندا ڕێوشوێنی توندی ئەمنی لە ناوەوە و دەوروبەری بنکەی شەددادی گیرابووە بەر.

 

ئەمەش بزانە: ئەم سیستەمە تەکنەلۆژیایەکی پێشکەوتووە و بە واتای سیستەمی بەرپەرچدانەوەی مووشەک، تۆپخانە و هاوەن دێت بۆ پاراستنی بنکە سەربازییەکان لە هەر هێرشێکی کتوپڕی لەناکاو، سیستەمەکە پشت بە ڕاداری ئاگادارکردنەوەی پێشوەختە دەبەستێت کە لە کاتی هاویشتنی مووشەک یان گوللە تۆپەکاندا، دەستبەجێ شوێنەکەیان دەستنیشان دەکات و پێش ئەوەی بگەنە ئامانجەکەیان، ڕێگرییان لێ دەکات و تێکیان دەشکێنێت.

 

باکگراوند: ئەم جووڵە سەربازییانە دوای ئەوە دێن کە لە 29ـی کانوونی یەکەمی ڕابردوو، دەنگی چەندین تەقینەوەی بەهێز لە بنکەی قەسرەک لە باکووری حەسەکە بیسترا، دواتر ڕاگەیەنرا بەهۆی مەشقی هاوبەشی هەسەدە و هاوپەیمانان بووە و تێیدا تۆپخانە و سیستەمی ڕادار و ئاگادارکردنەوەی پێشوەختە تاقیکراونەتەوە.