بەریتانیا: هیچ پەیوەندییەکمان بە هێرشەکانی ئەمریکا بۆ سەر ڤەنزوێلا نییە

ئاڤا نیوز

 

کیەر ستارمەر، سەرۆکوەزیرانی بەریتانیا ڕایگەیاند، بەریتانیا بە هیچ شێوەیەک بەشدار نەبووە لە ئۆپەراسیۆنی هێرشەکانی ئەمریکا بۆ سەر ڤەنزوێلا، دەشڵێت کار دەکەین بۆ سەلامەتی هاووڵاتیانمان لە وڵاتانی ئەمریکای باشوور.

 

چیرۆکی سەرەکی: دوای چەند مانگێک لە گرژیی نێوان ئەمریکا و ڤەنزوێلا، ئەمڕۆ شەممە ئەمریکا هێرشی بۆ سەر ڤەنزوێلا ئەنجام دا و نیکۆلاس مادورۆ، سەرۆکی وڵاتەکە و خێزانەکەی دەستگیر کرد.

 

لێدوانی فەرمی: کیەر ستارمەر، سەرۆکوەزیرانی بەریتانیا، ڕایگەیاند، لەبارەی گرتنی نیکۆلاس مادۆرۆ، سەرۆکی ڤەنزوێلا قسەی لەگەڵ دۆنالد ترەمپ نەکردووە، ستارمەر ئاماژەی بەوەدا، پێش ئەوەی بە تەواوی لێدوان لەسەر هێرشەکە بدات، زانیاریی کۆدەکاتەوە، دەشڵێت، بێگومان دۆخەکە بەخێرایی دەگۆڕێت و پێویستە هەموو ڕاستییەکان بەدەستبهێنین.

 

-لەگەڵ باڵیۆزخانەی بەریتانیا لە ڤەنزوێلا قسەمان کردووە بۆ ئەوەی دڵنیابین 500 هاووڵاتی بەریتانی کە وڵاتانی ئەمریکای باشوورن، سەلامەت و پارێزراون.

 

زانیاریی زیاتر: لە وەڵامی پرسیاری ڕۆژنامەنووسان، ئایا "ستارمەر" پلانی هەیە هێرشەکە ئیدانە بکات، ستارمەر دەڵێت: "دەمەوێت سەرەتا بەڵگەکان پشتڕاست بکەمەوە، قسە لەگەڵ سەرۆک ترەمپ بکەم،  ئێستا تەنیا دەتوانم ئەوەندە بڵێم، ئێمە بەشداریی هێرشەکانمان نەکردووە."