لە حەلەب ئاڵۆزییەکان بەرەو پێکدادانی گەورەتر هەنگاو دەنێن

ئاڤا نیوز

شەڕی نێوان هێزەکانی ئاسایشی ناوخۆ و هێزە ئەمنییەکانی سەر بە حکومەتی سووریا لە گەڕەکە کوردییەکانی حەلەب بەردەوامە و بەهۆیەوە تاوەکو ئێستا،  نزیکەی 80%ـی دانیشتووانی هەردوو گەڕەک بەرەو گەڕەکی سەریان ئاوارەبوون.

چیرۆکی سەرەکی: سوپای سووریا هەردوو گەڕەکەکە کوردییەکەی وەک "ناوچەی سەربازیی داخراو" ناساند و قەدەغەی هاتووچۆی بەتەواوی ڕاگەیاند، هاوکات بە چڕی دەستی بە بۆردوومانکردنی ناوچەکە کرد، بەگوێرەی ئامارەکانی هەسەدە بەهۆی هێرشەکانەوە نزیکەی 20 کەس کوژراون و 50 کەسی دیکەش برینداربوون.

ڕاگەیێنراوی فەرمی: فەرماندەیی گشتیی هێزەکانی سووریای دیموکرات (هەسەدە) ڕایگەیاند، هیچ هێزێکی سەربازییان لە حەلەب نییە و ئەو تۆمەتانەی حکومەتی دیمەشق بۆ هێرشکردنە سەر گەڕەکەکانی شێخ مەقسوود و ئەشرەفیە بەکاریاندەهێنێت، "هەڵبەستراون". هۆشداریش دەدات بەردەوامیی ئەم هێرشانە دەبێتە هۆی ئاڵۆزی شارەکانی دیکەی سووریا.

بۆچوونی لایەنی بەرامبەر: لەبەرامبەردا حکومەتی سووریا لە ڕاگەیێنراوێكی فەرمیدا وەڵامی هێزەکانی هەسەدە  دەداتەوە و دەڵێت " ئەو زانیارییانەی هەسەدە لەبارەی گەڕەکەکانی شێخ مەقسوود و ئەشرەفیە بڵاوی کردوونەتەوە، پێچەوانەی ڕێککەوتنی یەکی نیسانی 2025 و دوورن لە ڕاستییەوە.

لە ڕاگەیێنراوەكەدا هاتووە، جەختکردنەوەی هەسەدە لەسەر نەبوونی هێزی سەربازییان لەنێو حەلەب، دانپێدانانێکی ڕاشکاوە بەوەی هیچ دەسەڵاتێکی ئەمنییان لە شارەکەدا نەماوە، بەپێی دەستوور و یاسا، پاراستنی ئاسایشی شارەکە و گیانی دانیشتووانەکەی لە ئەستۆی دیمەشقدایە.

لەلایەکی دیکەوە: هەر بەهۆی تێکچوونی دۆخی ئەمنی ئەو پارێزگایە، دەستەی فڕۆکەوانیی مەدەنیی سووریا گەشتەکانی فڕۆکەخانەی نێودەوڵەتیی حەلەبی تا کاتژمێر 11ـی شەوی پێنجشەممە ڕاگرت و گەشتەکانی بۆ فڕۆکەخانەی دیمەشق گواستەوە ئەگەری زۆریش هەیە درێژبکرێتەوە.

شارەزایانی سەربازی پێیان وایە حەلەب لەبەردەم کاتژمێری یەکلاکەرەوەییدایە، هەرچەندە حکومەتی سووریا دەڵێت پاراستنی هەموو پێکهاتەکان ئەرکی دەوڵەتە، بەڵام ئاڵۆزییەکان بەرەو پێکدادانی گەورەتر هەنگاو دەنێن.