كامێرای تایبەت بە سزادانی ئەو شۆفێرانەی مۆبایل بەكاردەهێنن دەكەوێتە كار

ئاڤا نیوز

بەڕێوەبەرایەتیی هاتووچۆی هەولێر کار لەسەر ئەوە دەکات، کامێرای تایبەت بۆ تۆمارکردنی سەرپێچی بەکارهێنانی مۆبایل لە کاتی شوفێری بخاتە كار، چونکە هۆکاری بەشێکی زۆر لە ڕووداوەکانی هاتوچۆ بەکارهێنانی مۆبایلە.

ئەوەی پێویستە بیزانیت: ئێستا کامێراکانی تیژڕۆیی و پۆینت تو پۆینت، لەکاتی تۆمارکردنی سەرپێچی تیژڕۆیی یان تێپەڕاندنی تێکڕای خێرایی ئەگەر شوفێرەکە پشتێنی سەلامەتی نەبەستبێت یان مۆبایل بەکاربهێنێت، سزای ئەوانیشی دێتە سەر، 40 هەزار بەکارهێنانی مۆبایل و 30 هەزار دینار نەبەستنی پشتێنی سەلامەتی.

لێدوانی فەرمی: هێمن حه‌مه‌دئه‌مین، وتەبێژی هاتووچۆی هەولێر بە ئاڤای گوت، "لە کاتی شوفێری پێویستە شوفێران لە باشترین حاڵەتی هزر و هۆشدا بن، بۆیە سەرقاڵی ئەو بیرۆكەیەین كە کامێرای تایبەت بە تۆمارکردنی سەرپێچی مۆبایل بەكاربهێنین، لە چەند شەقامێکیش دانراوە و لە داهاتوو دەکەوێتە کار."

ئاماژەی بەوەشکرد، ئێستا لەڕێگەی تیمە گەڕۆکەکانەوە سەرپێچی تۆماردەکرێت، واتا لەسەر شەقام هەر شوفێرێک ببینرێت لەکاتی شوفێری مۆبایل بەکاربهێنێت، لەلایەن تیمی گەڕۆکەوە سزای بۆ دەنووسرێت.