بەڕێوەبەری ڕوانگەی سووری: لە حەلەب چەكی قورس لە دژی خەڵكی سڤیل بەكار هێنراوە

ئاڤا نیوز

گرژی و ئاڵۆزییەكانی نێوان هێزەكانی سەر بە حكومەتی سووریا و ئاسایشی ناوخۆ لە گەڕەکە کوردییەکانی حەلەب بەردەوامە و بەڕێوەبەری ڕووانگەی سووری بۆ مافەكانی مرۆڤیش دەڵێت، چەكی قورس لەدژی خەڵكی سڤیل بەكار هاتووە.

چیرۆکی سەرەکی: هێرشی هێزەکانی سەر بە حکومەتی سووریا بۆ سەر گەڕەکە کوردییەکانی حەلەب بەردەوامە، بەهۆیەوە بەشێکی زۆری دانیشتووانی هەردوو گەڕەکی شێخ مەقسوود و ئەشرەفییە ئاوارە بوون.

لێدوانی فەرمی: ڕامی عەبدولڕەحمان، بەڕێوەبەری ڕوانگەی سووری بۆ مافەکانی مرۆڤ لە سوریا بە ئاڤای گوت، مەترسیی گەورە لەسەر دانیشتووانی  هەردوو گەڕەكی شێخ مەقسود و ئەشرەفیە هەیە، ئێستا ئەو دوو گەڕەكە گەمارۆ دراون و خەڵكی سڤیلیش بە ئامانج گیراون، هاوكات ژمارەیەك بریندار لە نەخۆشخانەكانی ئەم دوو گەڕەكەن بەهۆی گەمارۆكەوە ژیانیان لە مەترسیدایە.
   
ئاماژەی بەوەشکرد، هەموو شتێکمان تۆمار کردووە، تۆپ و تانك لەدژی خەڵكی سڤیل بەكار هێنراوە، ئەوانەی ساڵی 2015 هێرشیان کردە سەر کورد هەر ئەوانەن دەیانەوێت کورد ئەو شوێنانە چۆڵ بکەن و ئاوارەبن، ئەوانەی هێرشیان کردووەتە سەر کورد داعش نین، بەڵام بیری داعش و جینۆسایدکەریان هەڵگرتووە.