ئەمریکا پشتگیرییەکانی بۆ 66 ڕێکخراو و دامەزراوەی دیکە ڕادەگرێت

ئاڤا نیوز

سەرۆکی ئەمریکا بڕیارێکی جێبەجێکردنی واژۆکرد کە ئەمریکا لە 66 دامەزراوە و ڕێکخراوی نێودەوڵەتی دەکشێنێتەوە بە بیانووی ئەوەی چیتر خزمەت بە بەرژەوەندییەکانی ئەمریکا ناکەن.

وێنە گەورەکە: ترەمپ فەرمانی بە ئیدارەکەی کردووە پێداچوونەوە بە بەشداریکردن و دابینکردنی بودجەی سەرجەم ڕێکخراوە نێودەوڵەتییەکان بکات، لەوانەش ئەو ڕێکخراوانەی کە پەیوەندییان بە نەتەوە یەکگرتووەکانەوە هەیە.

ڕاگەیێنراوی فەرمی: کۆشکی سپی بڵاویکردووەتەوە، دۆناڵد ترەمپ فەرمانێکی واژۆ کردووە کە پشتگیرییەکانی ئەمریکا بۆ 66 ڕێکخراو و دامەزراوە و کۆمیسیۆنی نێودەوڵەتی ڕاگرتووە، بەپێی فەرمانەکە ترەمپ سەرجەم دەسەڵاتە جێبەجێکارەکان ئاراستە دەکات واز لە پارەدان بە 31 دامەزراوەی سەر بە نەتەوە یەکگرتووەکان و 35 دامەزراوەی دیکە کە سەر بە نەتەوە یەکگرتووەکان  نین بوەستێنن.

کۆشکی سپی لە ڕاگەیێنراوەکە دەڵێت: "سەرۆک ترەمپ ئەم بڕیارەی دوای هەڵسەنگاندنێکی ورد داوە، چونکە ئەو ڕێکخراوانە چیتر خزمەت بە بەرژەوەندییەکانی ئەمەریکا و باجدەرانی ئەم وڵاتە ناکەن." هەرچەندە هێشتا ناوی هەموو ڕێکخراوەکان ڕانەگەیێنراوە، بەڵام ئەم هەنگاوە وەک جێبەجێکردنی دروشمی "ئەمەریکا لە پێشینەیە" دەبینرێت.