یەکێتی و پارتی لەسەر دوو پرسی چارەنووسساز کۆدەبنەوە

ئاڤا نیوز

لە هەولێر ئەمڕۆ شاندی یەکێتی و پارتی کۆدەبنەوە، بەپێی زانیارییەکانی ئاڤا لە کۆبوونەوەکەدا، ئەگەری زۆرە وادەی پێکهێنانی حکومەتی نوێ و کاندیدێکی هاوبەش بۆ پۆستی سەرۆککۆماری عێراق دیاری بکرێن.

وێنە گەورەکە: ساڵێک و سێ مانگە هەڵبژاردنی خولی شەشەمی پەرلەمانی کوردستان کراوە، بەڵام هێشتا کابینەی دەیەمی حکومەتی هەرێمی کوردستان پێکنەهاتووە.

زانیاریی پەیامنێر:  کوردستان حەسەن، پەیامنێری دیپلۆماسی ئاڤا ڕایگەیاند، ئەمڕۆ لە هەولێر کاتژمێر 11:00ـی پێشنیوەڕۆ پارتی و یەکێتی کۆدەبنەوە، کوبوونەوەکە لەسەر دوو تەوەری گرنگ دەکرێت، تەوەری یەکەم پێکهێنانی حکومەتی نوێی هەرێمی کوردستانە، تەوەری دووەم دیاریکردنی کاندیدێکە بۆ پۆستی سەرۆککۆماری عێراق.

 یەکێتی داوا لە پارتی دەکات بۆ دیاریکردنی کاندیدێکی هاوبەش بۆ پۆستی سەرۆککۆماری عێراق هاوکاری بێت. سەرکردەکانی شیعە و سوننەش چاوەڕێی کوردن بۆ دیاریکردنی کاندیدێکی هاوبەش.

لێدوانی فەرمی: مەحموود محەممەد، گوتەبێژی پارتی دیموکراتی کوردستان بە ئاڤای وت، لە کۆبوونەوەکەی ئەمڕۆ گفتوگۆیەکی چڕدەکرێت، ئەگەری زۆرە وادەی پێکهێنانی حکومەتی نوێ و کاندیدێکی هاوبەش بۆ پۆستی سەرۆککۆماری عێراق دیار بکرێن.

زانیاری زیاتر: ئاڤا زانیویەتی کۆبوونەوە و گفتوگۆکانی ئەو دوو حیزبە لەسەر ئەو دوو پرسە بەردەوام دەبێت و ڕای پارتی لەسەر کاندیدێکی هاوبەش بۆ پۆستی سەرۆککۆماری عێراق ئەوەیە کە کاندیدەکە کوردبێت ڕای زۆرینەی کوردی لەسەربێت.