سوپای سووریا قەدەغەی هاتووچۆ و هێرشی چڕ بۆ سەر گەڕەکێکی دیکەی کوردی ڕادەگەیەنێت

ئاڤا نیوز

سەرەڕای بڕیاری قەدەغەی هاتووچۆ لە گەڕەکەکانی شێخ مەقسوود، ئەشرەفیە سوپای سووریا هەمان بڕیاری لە گەڕەکی بەنی زەیدی شاری حەلەب ڕاگەیاند و ئاشکرای کرد دەست بە هێرشی چڕ و ورد بۆ سەر بنکەکانی هێزەکانی سووریای دیموکرات (هەسەدە) دەکات. ئەم بڕیارە کە تا کاتێکی نادیار بەردەوام دەبێت، وەک ئامادەکارییەک بۆ ئۆپەراسیۆنێکی سەربازیی نوێ لە ناوچەکەدا دەبینرێت.

ڕاگەیێنراوی فەرمی: لە ڕاگەیەندراوێکی فەرمیدا، دەستەی ئۆپەراسیۆنەکان ئاشکرای کرد کە سوپای سووریا هەر لە کاتژمێر 1:30ـەوە دەست بە ئۆپەراسیۆنی "پێکان و ئامانجی ورد" دەکات دژی بنکەکانی هەسەدە لەو سێ گەڕەکەی حەلەب.

لە ڕاگەیێنراوەکەدا سوپای سووریا هۆشداریی دایە هاووڵاتیانی مەدەنی دەستبەجێ لە سەرجەم بنکە و پێگە سەربازییەکانی هەسەدە دوور بکەونەوە، چونکە ئەو شوێنانە دەبنە ئامانجی ڕاستەوخۆی هێرشە وردەکانیان.

ئەم هەنگاوە دوای ئەوە دێت کە سوپا پێشتر ئەو ناوچانەی وەک "ناوچەی سەربازیی داخراو" ناساندبوو و داوای لە دانیشتووان کردبوو لە ڕێگەی دەروازە مرۆییەکانەوە ناوچەکە چۆڵ بکەن.

کاریگەریی و لێکەوتەکان: ئەم پێشهاتە سەربازییەی سوپای سووریا مەترسییەکانی بۆ سەر گیانی هاووڵاتیانی سڤیل و تێکچوونی زیاتری دۆخی مرۆیی لە حەلەب زیاتر کردووە، لە کاتێکدا دانیشتووانی ئەو گەڕەکانە لە ژێر فشارێکی تووندی سەربازیدان.