قائانی لە سەردانێکی کتوپڕدا لە بەغدا بوو؛ هەوڵێک بۆ ڕێکخستنەوەی چەکی گرووپە چەکدارەکان

ئاڤا نیوز

فەرماندەی فەیلەقی قودسی سوپای پاسداران، لە سەردانێکی "کتوپڕ" و ڕانەگەیەنراودا لە بەغدا بوو و لەگەڵ سەرکردەی گرووپە چەکدارەکان کۆبووەوە. 

چیرۆکی سەرەکی: ئامانجی سەرەکیی ئەم سەردانە، کە لە 48 کاتژمێری ڕابردوودا ئەنجام دراوە و تەنیا چەند کاتژمێرێکی خایاندووە، ڕێکخستنەوەی چەکی گرووپەکان و ڕێگریکردن بووە لە دروستبوونی هەر ململانێیەکی ناوخۆیی لەسەر پرسی ڕادەستکردنی چەک بە دەوڵەت، کە ئێستا یەکێکە لە ئاڵۆزترین بابەتە سیاسی و ئەمنییەکانی عێراق.

بڵاوکراوەی ڕۆژنامەوانی: بەگوێرەی میدیای عێراق، ئیسماعیل قائانی، فەرماندەی فەیلەقی قودسی سوپای پاسداران لە کۆبوونەوەکانیدا جەختی لە یەکڕیزیی هەڵوێست کردووەتەوە تاوەکو ڕێگری لە هەر دابەشبوونێکی ناوخۆیی بگیرێت؛ بەتایبەتی دوای ئەوەی ڕاگەیەنراوی "تەنسیقییەی مقاوەمە" لە 4ی کانوونی دووەمی 2026دا درزی خستە نێوان لایەنەکان و عەسائیبی ئەهلی حەق، کە ڕایگەیاند بەیاننامەکە گوزارشت لەوان ناکات.

ئەوەی پێویستە بیزانیت: واشنتن فشارەکانی بۆ سەر بەغدا چڕ کردووەتەوە تاوەکو دیاردەی چەکی دەرەوەی دەزگا فەرمییەکان کۆتایی پێ بهێنرێت و پەیوەندییە دووقۆڵییەکانی بەم پرسەوە بەستووەتەوە.

زانیاریی زیاتر: پرسی چەکی گرووپە چەکدارەکان لە عێراقدا لە نێوان "پیرۆزی" و "سەروەری"دا قەتیس بووە؛ زۆربەیان کشانەوەی هێزە بیانییەکان بە مەرجی سەرەکی بۆ هەر گفتوگۆیەک دادەنێن.

ئەمەش بزانە: قائانی وەک ئەڵقەی پەیوەندیی سەرەکیی نێوان تاران و هاوپەیمانەکانی، هەوڵ دەدات لەم ساتەوەختە هەستیارەدا هاوسەنگییەکی سیاسی بپارێزێت و ڕێگری لە هەر لێکترازانێکی "میحوەری مقاوەمە" بکات کە ڕەنگە دەرەنجامی خراپی بۆ سەقامگیریی عێراق هەبێت.