ناوەڕۆکی کۆبوونەوەی پارتی و یەکێتی لەبارەی پێکهێنانی حکومەت و پۆستی سەرۆککۆمار

ئاڤا نیوز

شاندی دانوستانكاری پارتی و یەكێتی لە بارەگای مەكتەبی سیاسیی یەكێتی لە هەولێر كۆبوونەوە؛ تەوەری سەرەكیی گفتوگۆكان وەڵامی یەكێتی بوو بۆ پەیامی هۆشیار زێباری بۆ بافڵ تاڵەبانی لەبارەی پۆستی سەرۆككۆماری عێراق و كابینەی نوێی حكومەتی هەرێمی كوردستان.

وێنە گەورەكە: پارتی دیموكراتی كوردستان لە هەوڵدایە بەرلەوەی كابینەی نوێی حكومەتی عێراق یەكلایی بكرێتەوە لەناوخۆ بابەتی پێكهێنانی كابینەی دەیەم یەكلایی بكرێتەوە، مەرجی سەرەكیی پارتیش بۆ پشتیوانیكردنی كاندیدی یەكێتی لە بەغدا بۆ پۆستی سەرۆككۆمار ئەوەیە: دەبێت پێش 28ـی ئەم مانگە (كە دوا وادەی هەڵبژاردنی سەرۆككۆمارە)، پەرلەمانی كوردستان كارا بكرێتەوە، سەرۆكی هەرێم هەڵبژێردرێت و مەسرور بارزانی بۆ پێكهێنانی كابینەی نوێی حكومەت ڕابسپێردرێت.

چیرۆكی سەرەكی: ئەمڕۆ پێنجشەممە هەردوو شاندی دانوستانكاری پارتی دیموكراتی كوردستان و یەكێتی نیشتمانی كوردستان لەبارەگای مەكتەب سیاسی یەكێتی لە هەولێر كۆبوونەوە.

زانیاریی تایبەت: بە گوێرەی ئەو زانیارییانەی دەست ئاڤا میدیا كەوتووە، هەردوولا لەسەر كارنامەی هاوبەشی حكومەت هاوڕان كە پێشتر لەسەری رێككەوتبوون، هاوكات لەسەر دابەشكردنی پۆستەكانی حكومەتی كوردستان و مەسەلەی سەرۆككۆمار بیروڕایان ئاڵوگۆڕ كردووە.

ئەوەی پێویستە بیزانیت: ئاڤا زانیویەتی كۆبوونەوەی ئەمجارە بەراورد بە كۆبوونەوەی پێشتر باشتر بووە، لە هەندێك شت لێكتێگەیشتن هەبووە، بەڵام لە پرسی سەرۆككۆمار نەگەیشتوونەتە ڕێككەوتن.

زانیاریی زیاتر: هەردوولا لەسەر ئەوە ڕێككەوتوون هەفتەی داهاتوو كۆبوونەوەیەكی تر بكەن.