تۆم باراک: ئەمریکا بە نیگەرانییەوە و لە نزیکەوە چاودێریی پێشهاتەکانی ئەشرەفییە و شێخ مەقسوود دەکات

ئاڤا نیوز

نێردەی تایبەتی ئەمریکا بۆ سووریا داوای ڕاگرتنی دەستبەجێی شەڕ لە حەلەب دەکات و دیدگایەکی نوێ بۆ "سووریایەکی گشتگیر" دەخاتە ڕوو، کە تێیدا مافی هەموو پێکهاتەکان پارێزراو بێت.

وێنە گەورەکە: واشنتن دەیەوێت لە ڕێگەی "ئاشتییەکی نیشتمانییەوە" ڕێگری لە داڕمانی دۆخی سووریا و حەلەب بگرێت. ئەمریکا کار بۆ مۆدێلێکی سیاسی دەکات کە تێیدا هیچ پێکهاتەیەک (کورد، سوننە، مەسیحی، درۆز، عەلەوی) هەست بە پەراوێزخستن نەکات؛ ئەمەش تەنیا لە ڕێگەی گۆڕینی زمانی "تووندوتیژی" بۆ زمانی "هاوئاهەنگی" دەستەبەر دەبێت.

لێدوانی فەرمی: تۆم باراک، نێردەی تایبەتی ئەمریکا بۆ سووریا: "ئێمە ئامادەین بۆ ئاسانکاریکردن بۆ هەوڵەکانی هێورکردنەوەی گرژییەکان. داوا دەکەین شەڕ ڕابگرن؛ وەرزی نوێی سووریا، وەرزی هاوئاهەنگییە نەک ڕووبەڕووبوونەوە."

ئەوەی پێویستە بیزانیت: پێکدادانەکان لە نێوان هێزەکانی ئاسایشی ناوخۆ و سوپای سووریا پێیان ناوەتە سێیەم ڕۆژی بەردەوامەوە؛ لە مێژووی ئەم ململانێیەدا، ئەمە یەکێکە لە سەختترین قۆناغەکان، چونکە سوپای عەرەبیی سووریا گەمارۆیەکی تووندی سەربازی و ئابووریی خستووەتە سەر هەردوو گەڕەکی شێخ مەقسوود و ئەشرەفییە و بە تەواوی ڕێگری لە گەیشتنی خۆراک، دەرمان و سووتەمەنی دەکات، ئەمەش ژیانی هەزاران هاووڵاتیی مەدەنیی لە ناو جەرگەی شاری حەلەبدا خستووەتە مەترسییەوە.