یەكێتیی زانایان: ئەوەی بەرامبەر بە كورد دەكرێت لە حەلەب پێچەوانەی بنەماكانی ئیسلامە

ئاڤا نیوز

یەكێتیی زانایانی ئایینی ئیسلامیی كوردستان پەیامێك سەبارەت بە هێرشی سوپای عەرەبی سووریا بۆ سەر گەڕەكەكانی ئەشرەفییە و شێخ مەقسوودی حەلەب بڵاو دەكاتەوە و دەڵێ ئەوەی لەو دوو گەڕەكە بەرامبەر كورد و خەڵكی سڤیل دەكرێت پێچەوانەی بنەماكانی ئایینی ئیسلامە.

چیرۆکی سەرەکی: یەكێتی زانایانی ئایینی ئیسلامیی كوردستان لە پەیامەكەیدا دەڵێ: بە ئامانجگرتنی کورد و خەڵکی سڤیلی هەردوو گەڕەکی شێخ مەقسوود و ئەشرەفییە لە حەلەب، بە هەموو پێوەرێک پێچەوانەی بنەماکانی ئایینی پیرۆزی ئیسلام و مافەکانی مرۆڤ و رێسا نێودەوڵەتیەکانە، هیچ یاسا و لۆژیکێک جگە لە دەمارگیری کوێرانە؛ رێگە بەو هێڕش و کوشتن و ستەمە گەورەیە نادات.

ڕاگەیێنراوی فەرمی: یەكێتی زانایانی ئایینی ئیسلامیی كوردستان وێڕای ئەوەی بە توندی هێرشی سوپای عەرەبی سووریا ئیدانە دەكات ڕاشیدەگەیێنێت: هیوادارین کۆمەڵگەی نێودەوڵەتی لەئاست ئەو هێڕشکارییە بەرامبەر کورد بێ دەنگ نەبێت، داوا لە دامەزراوەو کەسایەتی ئایینی کورد و عەرەب لەناو سوریا دەکەین بەرپرسیارانە رۆڵی خۆیان ببینن و فاکتەری هێورکردنەوە و راگرتنی شەڕ بن نەک فووکردن.

ئەمەش بزانە: یەكێتی زانایان داواش لە حکومەتی سوریا دەکات ئەو شەڕ و دەستدرێژییانە رابگرێت، لە بری گەمارۆ و گرژی و شەڕ، دانوستان و ئاشتی و دیالۆگ بکاتە هەوێنی بونیادنانی سوریای نوێ و مافی پێکهاتەکان لەبەرچاو بگرێت.