سەرجەم ئەو پاسانەی بۆ گواستنەوەی ئاسایشی ناوخۆی حەلەب دانرابوون کشانەوە

ئاڤا نیوز

پرۆسەی گواستنەوەی چەکدارانی ئاسایشی ناوخۆ لە شاری حەلەبەوە پەککەوت؛ دوای ئەوەی ئەنجوومەنی گەل ڕایگەیاند "لە بەرگریی بەردەوام دەبین"، سەرجەم ئەو پاسانەی بۆ گواستنەوەی هێزەکان هاتبوون، کشانەوە.

چیرۆکی سەرەکی: پێشنیوەڕۆی ئەمڕۆ هەینی (9-1-2026) ژمارەیەکی زۆر پاس لە دەوروبەری مەیدانی "لایرامۆن" جێگیرکرابوون و چاوەڕێی چوونە ناو گەڕەکی شێخ مەقسوودیان دەکرد بۆ گواستنەوەی چەکدارانی ئاسایش بەرەو باکووری ڕۆژهەڵاتی سووریا.

٠ دوابەدوای ئەوە ئەنجوومەنی گەل لە حەلەب بێدەنگی شکاند و ڕایگەیاند: "ئێمە جێگیرین و لە بەرگری بەردەوام دەبین"، دوای ئەم ڕاگەیێنراوە، سەرجەم پاسەکان مەیدانەکەیان چۆڵکرد و گەڕانەوە بۆ ئەو شوێنانەی لێوەی هاتبوون.

ئەوەی پێویستە بیزانیت: شەڕی حەلەب چوار ڕۆژە بەردەوامە و سوپای عەرەبی سووریا بە تانک و زرێپۆش گەمارۆی گەڕەکە کوردییەکانی داوە. هەرچەندە بەیانیی ئەمڕۆ ئاگربەستێکی کاتی ڕاگەیێنرا، بەڵام پاشەکشەی پاسەکان نیشانەی ئەوەیە جارێکی دیکەی گرژی و ئاڵۆزی دروستبووەتەوە.