ئەحمەد شەرع پەیوەندییەکی تەلەفۆنی بە سەرۆک بارزانییەوە کرد

ئاڤا نیوز

ئەحمەد شەرع، سەرۆکی سووریا، لە پەیوەندییەکی تەلەفۆنیی مێژووییدا لەگەڵ سەرۆک بارزانی، جەختی لە پاراستنی مافەکانی کورد کردەوە؛ سەرۆک بارزانیش پشتیوانیی خۆی بۆ بنیاتنانی دەوڵەتێکی گشتگیر بۆ هەموو سوورییەکان دەربڕی.

چیرۆکی سەرەکی: هاوکات لەگەڵ پەرەسەندنی گرژییەکانی هەردوو گەڕەکی شێخ مەقسوود و ئەشرەفییە لە حەلەب لە نێوان چەکدارانی ئاسایشی ناوخۆی حەلەب و سوپای عەرەبی سووریا، ئەمڕۆ هەینی ئەحمەد شەرع، پەیوەندییەکی تەلەفۆنی بە سەرۆک بارزانییەوە کرد.

ڕاگەیێنراوی فەرمی: بارەگای بارزانی ڕایگەیاند: لەو پەیوەندییە تەلەفۆنییەدا دوایین پێشهاتە سیاسیەكانی سووریا و گۆڕانكارییەكانی ناوچەكە خرایە بەر باس و هەردوولا جەختیان لە بایەخی سەقامگیری و هەماهەنگیی هاوبەش كردەوە.

٠ هەر لەو پەیوەندییە تەلەفۆنیەدا سەرۆك بارزانی پێزانینی بۆ ئەو تێروانینەی ئەحمەد شەرع هەبوو و پشتیوانی خۆی بۆ ویست و ئاواتی سوورییەكان بۆ بنیاتنانی دەوڵەتێك ڕاگەیاند كە هەموو لایەن و پێكهاتەكان بگرێتەخۆ و تێیدا هاوبەش بن. هەروەها جەختیشی لە پێویستی بەردەوامیی ڕاوێژ و هەماهەنگی كردەوە ئەویش لەپێناو ڕەچاوكردنی بەرژەوەندیی هەموو لایەك و پاراستنی ئاشتەوایی كۆمەڵایەتی.

لەلایەکی دیکەوە: هەر لەمیانەی ئەو پەیوەندییە تەلەفۆنییەدا ئەحمەد شەرع، سەرۆکی سووریا بە سەرۆک بارزانی ڕاگەیاندووە: "کورد پێکهاتەیەکی ڕەسەن و سەرەکیی گەلی سووریایە؛ ئێمە پابەندین بە گەرەنتیكردنی هەموو مافە نیشتمانی، سیاسی و مەدەنییەكانیان بە شێوەیەكی یەكسان و بێ جیاوازی."