تورکیا دەچێتە ناو هاوپەیمانییە سەربازییە ستراتیژییەکەی سعوودیە و پاکستان

ئاڤا نیوز

پێگەی بلومبێرگی ئەمریکی بڵاوی کردەوە، تورکیا لە هەوڵدایە بۆ چوونە ناو هاوپەیمانییەکی بەرگری کە لە نێوان سعوودیە و پاکستاندا پێکهێنراوە. ئەم هەنگاوە ئەگەری دروستکردنی ڕیزبەندییەکی ئەمنی نوێی لێ دەکرێت کە کاریگەری قووڵی لەسەر هاوسەنگیی هێز لە ناوچەکەدا دەبێت.

ڕێککەوتنەکە بەمشێوەیە: ئەم ڕێککەوتنە بەرگرییە کە لە مانگی نۆی ڕابردوودا لە نێوان سعوودیە و پاکستان واژۆ کراوە، بنەمای بەرگریی بەکۆمەڵ پەیڕەو دەکات. بەو واتایەی هەر هێرشێک بۆ سەر یەکێک لە ئەندامەکان، وەک هێرش بۆ سەر هەمووان هەژمار دەکرێت، ئەمەش هاوشێوەی ماددەی 5ـی پەیمانی ناتۆیە.

زانیاریی بەدەستهاتوو: سەرچاوە ئاگادارەکان ئاماژە بەوە دەکەن کە گفتوگۆکانی تورکیا بۆ چوونە ناو ئەم پەیمانە گەیشتوونەتە قۆناغێکی پێشکەوتوو و ئەگەری ڕێککەوتنی کۆتایی زۆرە

تورکیا دەیەوێت هەریەک لە ڕیاز و ئیسلام ئاباد لە پڕۆژەی فڕۆکەی جەنگی "کان" بەشداری پێ بکات کە نەوەی پێنجەمی فڕۆکە جەنگییەکانە.

ئەوەی پێویستە بیزانیت: چوونە ناو ئەم هاوپەیمانییە قۆناغێکی نوێیە لە پەیوەندییەکانی تورکیا و سعوودیە دوای چەندین ساڵ لە گرژی. هەردوو وڵات ئێستا لە زۆر پرسدا هاوڕان، لەوانە: نیگەرانی لە هەژموونی ئێران، پشتگیریکردن لە دەوڵەتێکی سەقامگیری سوننە لە سووریا و داکۆکیکردن لە پرسی فەلەستین.