ئاسایشی ناوخۆی حەلەب وەڵامی پروپاگەندەکانی سوپای سووریا دەداتەوە

ئاڤا نیوز

ئاسایشی ناوخۆی حەلەب، سەر بە ئیدارەری خۆسەری ڕۆژئاوای کوردستان، لە ڕاگەیێنراوێکدا وەڵامی بانگەشە و پروپاگەندەکانی سوپای سووریا دەداتەوە.

ئەوەی پیویستە بیزانیت: سووپای سووریا ڕایگەیاندبوو، گوایە ئەوانەی بەرگری دەکەن لە هەردوو گەڕەکی ئەشرەفییە و شێخ مەقسوود لە حەلەب ئەندامانی ڕژێمی پێشووی سووریا و پارتی کرێکارانی کوردستان (پەکەکە) ـن.

بڵاوکراوەی فەرمی: لە بڵاوکراوەیەکدا ئاسایشی ناوخۆی حەلەب ئەو هەواڵە ڕەتدەکاتەوە و ڕایدەگەیێنێت، "ئەوە درێژەدانە بە سیاسەتی بە لاڕێبردن و زانیاریی ناڕاستن و شێواندنی ڕاستییەکانە، هاوکات بیانووگرتنە بۆ هێرشکردنە سەر گەڕەکە کوردییەکان."

ئاسایشی ناوخۆی حەلەب ڕایگەیاند: دووپاتی دەکەینەوە ئەوانەی کە بەرگری لە گەڕەکی شێخ مەقسوود دەکەن کوڕ و کچانی گەڕەکەکەن و بەرگری لە ماڵ و کەرامەتیان دەکەن لە کاتێکدا سەرکردەکانی ڕژێمی پێشوو لە پێگەکانی دامەزراوەی حکومەتی ئێستای دیمەشقن.

بەپێی بڵاوکراوەکە، یەکێکی دیکە لە بانگەشەکانی حکومەتی دیمەشق ئەوە بوو کە هێزەکانی ئاسایشی ناوخۆ 10 کەسیان کوشتبوو گوایە ڕەتیان کردووە چەک هەڵبگرن و شەڕ بکەن، ئەو دەنگۆیەش ڕەتدەکەینەوە و تەواوی بەرپرسیارێتی ئەوانەی ڕوودەدەن دەخەینە ئەستۆی حکومەتی دیمەشق.

زانیاریی زیاتر: ئاسایشی ناوخۆی حەلەب دەڵێت، گرووپە چەکدارەکانی حکومەتی سووریا ئەو تاوانانەی کوشتن و سووتاندن لە کەناراوەکانی سووریا و سوەیدا کردیان ئەمڕۆش بەردەوامن لە هەمان ڕێبازی تاوانکاری لە ڕێگەی تۆپبارانکردنی بە ئەنقەست و بەردەوامی گەڕەکی شێخ مەقسوود، بە بێ گوێدانە یاسا نێودەوڵەتییەکان و ژیانی خەڵکی سڤیل.