ئەنجوومەنی ئاسایش کۆبوونەوەیەکی بەپەلە لەسەر ئۆکراینا ئەنجام دەدات

ئاڤا نیوز

 

ئەنجوومەنی ئاسایشی نەتەوە یەکگرتووەکان پلانی هەیە ڕۆژی دووشەممەی ئەم هەفتەیە کۆبوونەوەیەکی بەپەلە لەسەر پرسی ئۆکراینا ئەنجام بدات، بەهۆی پەرەسەندنی زیاتری جەنگی نێوان ڕووسیا و ئۆکراینا.

 

وێنە گەورەکە: کۆبوونەوەی داهاتووی ئەنجوومەنی ئاسایشی نەتەوە یەکگرتووەکان، لە کاتێکدایە کە سەرۆک شارەوانی کیێڤی پایتەختی ئۆکراینا داوای لە دانیشتووانی وڵاتەکەی کرد پایتەخت بەجێبهێڵن، بەهۆی پچڕانی خزمەتگوزاریی گەرمکەرەوەی بەکۆمەڵ لە ئەنجامی هێرشەکانی ڕووسیاوە.

 

لێدوانی فەرمی: ئەندری مێلنیک، باڵیۆزی ئۆکراینا لە ئەنجوومەنی ئاسایشی نێودەوڵەتی، لە نامەیەکدا بۆ ئەنجوومەنەکە نووسیوویەتی، ''ڕووسیا و دەستدرێژییەکانی بەرامبەر بە خەڵکی مەدەنی گەیشتووەتە ئاستێکی نوێی ترسناک لە تاوانەکانی جەنگ و تاوانەکانی دژی مرۆڤایەتی''.

 

لە بەرامبەردا: کۆشکی سەرۆکایەتیی ڕووسیا 'کرێملین' پشتڕاستی کردەوە کە مووشەکێکی بالیستیکی ئۆرێشنیکی بۆ دووهەمین جار لە دوای دەستپێکردنی شەڕەکە ئاڕاستەی ئامانجە سەربازییەکانی لە ئۆکراینا کردووە.

 

زانیاری زیاتر: ئەم داواکارییەی ئۆکراینا بۆ ئەم کۆبوونەوەیە لەلایەن شەش ئەندامی ئەنجوومەنەکە پشتگیری کراوە کە بریتین لە فەرەنسا، لاتیڤیا، دانیمارک، یۆنان، لیبێریا و بەریتانیا.

 

باکگراوند: هەموو ئەمانە لە کاتێکدان، هەوڵەکان بەدەوامن بۆ ڕاگرتنی ئەو شەڕەی نزیکەی چوار ساڵە لەنێوان ڕووسیا و ئۆکراینا سەری هەڵداوە، بەڵام تاوەکو ئێستا هەردوولا نەگەیشتوونەتە هیچ ڕێککەوتنێک.