پارتەکانی گرینلاند: نامانەوێ ببین بە ئەمریکی

ئاڤا نیوز

 

پاش ئەوەی سەرۆکی ئەمریکا دۆناڵد ترەمپ جارێکی دیکە پێشنیاری بەکارهێنانی هێزی کرد بۆ وەرگرتنی گرینلاند، پارتە سیاسیەکانی گرینلاند بە تێکڕا بەیاننامەیەکیان دەرکردووە و دەڵێن " نامانەوێ ببین بە ئەمریکی".

 

چیرۆکی سەرەکی: سەرۆکی ئەمەریکا دۆناڵد ترەمپ ڕۆژی هەینی لە دانیشتن لەگەڵ رۆژنامەنوسان و کۆمپنیا وەبەرهێنەکانی بواری نەوت و وزە، رایگەیاند کە هیچ چار نییە، دەبێت ئەمریکا لە گرینلاند کارێک بکات، وەری دەگرین بەخۆشی بێت یان ناخۆشی.

 

ڕاگەیێنراوی فەرمی: سەرۆکی پێنج پارت لە پەرلەمانی گرینلاند ڕایدەگەیێنن "نە دەمانەوێ ببینە ئەمریکی، نە دانیمارکی، دەمانەوێ گرینلاندی بیین"، راشیانگەیاند کە داهاتوو گرینلاند تەنیا لەلایەن گرینلاندییەکانەوە بڕیاری لەسەر دەدرێت.

 

بەرهەڵستی: وڵاتی دانیمارک و هەموو وڵاتانی ئەوروپا، دەنگی خۆیان هەڵبڕیووە دژی هەڕەشەکانی ترەمپ لەبارەی دەست بەسەرداگرتنی گرینلاند.

 

زانیاری زیاتر: ژمارەی دانیشتوانی گرینلاند 56 هەزار کەسە و لە ساڵی 2009ـەوە هەنگاو بەرەو سەربەخۆیی دەنێت، لە هەڵبژاردنە پەرلەمانییەکەی گرینلاند لە مانگی ئازاری 2025، دەنگی ناسیۆنالیستەکان بەشێوەیەکی بەرچاو بەرزبوویەوە کە داوای ئەوە دەکەن دوورگەکەیان لە دانیمارک جیاببێتەوە و سەربەخۆ بێت.
.

 

ئەوەی پێویستە بزانرێت: ئەمریکا بنکەی سەربازی هەیە لە گرینلاند، بەڵام ترەمپ پێیوایە کە ئەو دوورگەیە زۆر گرنگە بۆ ئاسایشی نەتەوەیی ئەمریکا بۆ رێگریکردن لە جموجۆڵە سەربازییەکانی ڕوسیا و چین لە جەمسەری باکووری زەوی و وتی: ئەمریکا نایەوێت ببێتە هاوسێی چین و ڕووسیا، ئەگەر ئێمە گرینلاند وەرنەگرین ئەو وڵاتانە کاری خۆیان دەکەن و ئەوەش قبوڵ ناکەین.

 

لەلایەکی دیکەوە: هەردوو وڵاتی ڕوسیا و چین چالاکییە سەربازییەکانی خۆیان زیاد کردووە لە نزیک گرینلاند، بەڵام هیچ کامیان باسی ئەوەیان نەکردووە کە دەیانەوێ دەستی بەسەردا بگرن.

 

بابەتە ستراتیژییەکان: گرینلاند کە ناوچەیەکی خۆبەڕێوەبەری دانیمارکە، ڕێگا ستراتیژییەکانی ئاسمانی و دەریایی لە باکووری ئەتڵەسیدا دابین دەکات و کۆگایەکی دەوڵەمەندی ئەو کانزا دەگمەنانەیە کە لە زەویدا هەن و پێویستن بۆ دروستکردنی هەموو شتێک لە مۆبایلەوە تا تەکنەلۆژیای وزەی نوێبووەوە.