قایمقامی دەربەندیخان: کارکردن لە ڕێگای دەربەندیخان-زەڕایەن وەستاوە

ئاڤا نیوز

 

لە ساڵی نوێدا کارەکانی ڕێگای دەربەندیخان-زەڕایەن وەستاوە و قایمقامی دەربەندیخان لەڕێگەی ئاڤاوە داوایەک ئاراستەی لایەنە پەیوەندیدارەکان دەکات و دەڵێت، لە ماوەی ساڵێکدا زیاتر لە 100 ڕووداوی هاتووچۆ لە ڕێگاکە ڕوویانداوە و 14 بریندار و  گیان لە دەستدانی لێکەوتووەتەوە.

 

چیرۆکی سەرەکی: بە درێژایی 22 کیلۆمەتر ڕێگای زەڕایەن-دەربەندیخان  لە گوندی میرەدێ تاوەکو دەربەندیخان تەواو نەبووە، ڕێگاکە جگە لە ئاستەنگی هاتووچۆ، مەترسیی لەسەر ژیانی هاونیشتمانیان دروست کردووە و چەندین ڕووداوی نەخوازراو لە ماوەی ڕابردوو ڕوویانداوە.

 

لێدوانی فەرمی: سلێمانی محەممەد، قایمقامی دەربەندیخان، بە ئاڤای ڕاگەیاند: "لە دوای سەری ساڵەوە کارکردن لە ڕێگاکە وەستاوە و کۆمپانیای جێبەجێکار پارەی بۆ خەرجنەکراوە، بەهۆی ئەو شەپۆلە بارانبارینەشی ڕووی لە ناوچەکە کردووە، بەشێکی ڕێگاکە تێکچووە و مەترسیی لەسەر ژیانی هاونیشتمانیان دروستکردووە."

 

قایمقامی دەربەندیخان لەڕێگەی ئاڤاوە داوای تەواوکردنی ڕێگاکە دەکات و دەڵێت: "مەترسیی جددی لەسەر هاووڵاتیانی ناوچەکە هەیە و هیوادارین بە زوویی پارەی کۆمپانیاکە خەرج بکرێت و دەست بە کارەکانی بکاتەوە"

 

زانیاریی زیاتر: بە گوتەی محەممەد سلێمان، لە ساڵی ڕابردوو زیاتر لە 100 ڕووداوی هاتووچۆ لە ڕێگاکە ڕوویانداوە و بەم هۆیەوە 14 بریندار و گیان لە دەستدانی لێکەوتووەتەوە، بەشی هەرە زۆری ڕووداوەکانیش لە نزیک گوندی میرەدێ و لە درێژایی 10 کیلۆمەترێکدا ڕوویانداوە.