نوێنەری ترەمپ لەگەڵ ئەحمەد شەرع کۆبووەوە و ناوەڕۆکەکەی ئاشکرا کرد

ئاڤا نیوز

ئەمریکا داوای وڵاتێکی یەکگرتوو لە سووریا دەکات کە تێیدا سەرجەم پێکهاتەکان، لەوانە عەرەب، کورد، درووز، مەسیحی، عەلەوی، تورکمان، ئاشووری و پێکهاتەکانی دیکە، بە ڕێز و شکۆوە مامەڵەیان لەگەڵ بکرێت.

چیرۆکی سەرەکی: ئەمڕۆ شەممە تۆم باراک، نوێنەری ئەمریکا بۆ کاروباری سووریا لە دیمەشق لەگەڵ ئەحمەد شەرع، سەرۆککۆماری سووریا و ئەسعەد شەیبانی، وەزیری دەرەوەی سووریا کۆبووەوە، تاوتوێی پێشهاتەکانی ئەم دواییەی حەلەب و قۆناغە ڕاگوزەرییە مێژوویەکەی سووریایان کرد.

بڵاوکراوەی فەرمی: تۆم باراک، نوێنەری تایبەتی ئەمریکا بۆ کاروباری سووریا لە تۆڕی ئێکس بڵاوی کردەوە، سەرۆک ترەمپ ئەم ساتەوەختە وەک دەرفەتێکی وەرچەرخان و گرنگ بۆ سووریایەکی نوێ دەبینێت، وڵاتێکی یەکگرتوو کە تێیدا سەرجەم پێکهاتەکان، لەوانە عەرەب، کورد، درووز، مەسیحی، عەلەوی، تورکمان، ئاشووری و پێکهاتەکانی دیکە، بە ڕێز و شکۆوە مامەڵەیان لەگەڵ بکرێت و دەرفەتی بەشدارییەکی ڕاستەقینەیان لە دامەزراوەکانی حوکمڕانی و ئەمنیدا پێ بدرێت.

ئاماژەی بەوەش کرد، حکومەتی ئەمریکا پێشوازی لە گۆڕانکارییە مێژووییەکەی سووریا دەکات و پشتیوانییەکانی پێشکەش بە حکومەتی ئەو وڵاتە دەکات، لە کاتێکدا کە کار دەکات بۆ سەقامگیرکردنی وڵات، دووبارە بونیادنانەوەی دامەزراوە نیشتمانییەکان و بەدیهێنانی خواستەکانی هەموو سوورییەکان بۆ ئاشتی، ئاسایش و خۆشگوزەرانی.

لەلایەکی دیکەوە: سەبارەت بە هێزەکانی سووریای دیموکرات 'هەسەدە'، تۆم باراک ستایشی قوربانییەکانی ئەو هێزەی کرد لە تێکشکاندنی داعشدا و ڕایگەیاند، حکومەتی سووریا پابەندیی خۆی بە ڕێککەوتنی 10ـی ئاداری 2025 بۆ تێکەڵکردنی هەسەدە لەناو دامەزراوە نیشتمانییەکاندا دووپات کردووەتەوە و ئەم پڕۆسەیە دەبێت بە شێوەیەک بێت کە مافەکانی کورد بپارێزێت و یەکپارچەیی و سەروەری سووریاش بەهێز بکات.

لە بەشێکی دیکەی بلاوکراوەکەی، باراک نیگەرانی قووڵی واشنتنی بەرامبەر ڕووداوەکانی ئەم دواییەی شاری حەلەب دەربڕی کە هەڕەشە لە ڕێککەوتنەکانی نێوان حکومەت و هەسەدە دەکەن. داوای لە هەموو لایەنەکان کرد دان بەخۆدا بگرن، دەستبەجێ شەڕ ڕابگرن و بگەڕێنەوە سەر مێزی گفتوگۆ بەپێی ڕێککەوتنەکانی 10ـی ئادار و 1ـی نیسانی 2025.

نوێنەری ئەمریکا ڕایگەیاند، تیمی وەزیر ڕوبیۆ ئامادەیە بۆ ئاسانکاریکردن لە گفتوگۆیەکی بونیادنەر لەنێوان حکومەتی سووریا و هێزەکانی سووریای دیموکرات (هەسەدە) بە مەبەستی بەرەوپێشبردنی پڕۆسەیەکی تێکەڵکردنی گشتگیر و بەرپرسیارانە، پڕۆسەیەک کە ڕێز لە یەکپارچەیی سووریا بگرێت، بنەمای یەک دەوڵەتی خاوەن سەروەری بپارێزێت و پشتگیری لە ئامانجی هەبوونی یەک سوپای نیشتمانیی شەرعی بکات.

ئامانجەکە وەک خۆی دەمێنێتەوە، ئەویش سووریایەکی خاوەن سەروەری و یەکگرتووە لەگەڵ خۆی و دراوسێکانی لە ئاشتیدا بێت و تێیدا یەکسانی، دادپەروەری و دەرفەت بۆ هەموو گەلەکەی دەستەبەر بکرێت.

هەروەها داوای لە وڵاتانی دراوسێ و کۆمەڵگەی نێودەوڵەتی کرد پشتگیری لەم دیدگایە بکەن و هاوکاری و یارمەتی پێویست پێشکەش بکەن بۆ ئەوەی یارمەتیدەر بن لە گۆڕینی ئەم دیدگایە بۆ واقیع.