پێگەیەکی ئەمریکی نهێنی شکستهێنانی کۆبوونەوەی نێوان هەسەدە و حکومەتی سووریا ئاشکرا دەکات

ئاڤا نیوز

پێگەی ئەلمۆنیتەری ئەمریکی دیوێکی شاراوەی شکستهێنانی دانوستانەکانی نێوان هێزەکانی سووریای دیموکرات (هەسەدە) و حکومەتی سووریا ئاشکرا دەکات کە ڕۆژی 4ـی ئەم مانگە بە نێوەندگیری ئەمریکا بەڕێوەدەچوو.

زانیاریی بەدەستهاتوو: بەپێی ڕاپۆرتی پێگە ئەمریکییەکە، کۆبوونەوەی ڕۆژی چواری مانگی یەک لە دیمەشق، کە تێیدا مەزڵووم عەبدی، فەرماندەی گشتی هەسەدە و مورهەف ئەبو قەسره، وەزیری بەرگری سووریا بە ئامادەبوونی کێڤن لامبێرت، فەرماندەی هاوپەیمانان، سەرەتایەک بوو بۆ کۆتاییهاتنی ئاشتی نێوان هەسەدە و حکومەتی سووریا.

تەنیا دوو ڕۆژ دوای ئەو کۆبوونەوەیە، گەڕەکەکانی شێخ مەقسوود و ئەشرەفییە لە حەلەب بوونە گۆڕەپانی هێرشی قورسی هێزەکانی حکومەتی سووریا و گروپەکانیان.

لێدوانی فەرمی: فۆزا یوسف، بەرپرسی باڵای کوردی ڕۆژئاوا بە پێگە ئەمریکییەکەی وتووە، ڕەفتاری شاندی سووریا لە دانوستانەکاندا سەیر بووە و بەبێ هیچ پاساوێک کۆبوونەوەکەیان بەجێهێشتووە.

لە کۆبوونەوەکەدا ئەسعەد شەیبانی وەزیری دەرەوەی سووریا هاتووەتە ناو ژوورەکە و دوای ماوەیەکی کەم داوای لە تیمی هاوپەیمانان و یاریدەدەرەکانی کردووە بچنە دەرەوە. پاشان کۆتاییهاتنی کۆبوونەوەکەی ڕاگەیاندووە و وتی دەکرێت، دانوستانەکان لە 8ـی مانگی یەک دەستپێبکەنەوە.

لەلایەکی دیکەوە: سەرچاوە ئاگادارەکان لە کۆبوونەوەکە دەڵێن، سەرەتا پێشکەوتن هەبووە لە ڕێککەوتنی 10ـی ئادار، دیمەشق ڕازی بووە بە دروستکردنی سێ فیرقەی سەربازی لە ئەندامانی هەسەدە و سێ لیوای جیاواز بۆ ژنان، دژەتیرۆر، و پاسەوانی سنوور. بەڵام خاڵی ناکۆکی سەرەکی لەسەر متمانە بووە، دیمەشق داوای کردووە هێزەکانیان بە ئارەزووی خۆیان بچنە ناوچە کوردییەکان، لە بەرامبەردا هەسەدە داوای هەماهەنگی پێشوەختە و پاراستنی سەربەخۆیی ناوخۆیی کردووە.

بەپێی ئەلمۆنیتەر، بەرپرسانی کورد پێیان وایە ئەسعەد شەیبانی، وەزیری دەرەوەی سووریا، ڕێنمایی لە ئەنقەرەوە وەردەگرێت. تورکیا کە هەسەدە بە هەڕەشە بۆ سەر ئاسایشی نیشتمانی خۆی دەبینێت، گوشارێکی زۆری خستووەتە سەر دیمەشق بۆ هەڵوەشاندنەوەی ئەم هێزە. گومان دەکرێت هێرشەکەی حەلەب پلانێکی پێشوەختەی تورکیا و میلیشیاکانی بێت بۆ هێرشکردنە سەر ناوچەکانی ڕۆژئاوای فورات.